Стаффан де Мистура Астана процесі туралы өз ойын білдірді

208

Төрткүл дүние кешелі бері Астана процесінің барысын бақылап отыр. Келіссөздердің бүгін екінші күні басталды. Осы маңызды жиын туралы Біріккен Ұлттар Ұйымының Сирия мәселесі бойынша арнаулы өкілі Стаффан де Мистура өз ойын білдірді. Астана процесінің екінші күні басталды. Кешегі мәжілістің мән-жайын әзірге ашып айтқан ешкім жоқ. Талқылаудың оңай өтпесі анық.

Жиынға қатысушы жеті тарап және 15 оппозицияның өкілі бар. Әрқайсысы өз талап-ұсынысымен келген. Жиынның да діттегені барлық мүдделерді таразыға сала отырып, бір шешім табу. Таңертеңге жоспарланған келіссөзге ең алғашқы келгендердің бірі — БҰҰ-ның Сирия мәселесі бойынша арнайы елшісі Стаффан де Мистура. Ол жиынның жемісті аяқталарына сенім артып отыр.

Стаффан де Мистура, БҰҰ Бас хатшысының Сирия бойынша арнаулы өкілі:

— Кешірек бұл келіссөздерге қатысты толығырақ ақпарат беретін боламыз. Бірақ мен бұл мәселеде оптимистік бағытты ұстанамын.

Жиын жабық есік жағдайында өткендіктен, сарапшылар келіссөзден нақты қандай нәтиже күтуге болатынын нақты айта алмай отыр. Кешегі жиынның соңында «Оңтүстік майдан» оппозициялық тобының өкілдерімен сұхбаттасқан едік. Олар Ресей мен Түркиядан оқ атпау жөніндегі келісімнің орындалуын қадағалауды сұрап отыр. Олардың талап-тілектері ескерілер ме? Оны бүгінгі келіссөздің соңында білетін боламыз.

Авторлары: Асқарбек Қазанғап, Бауыржан Қадыржанов




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *