Н.Назарбаев: Универсиада алауы әрбір спортшы мен жанкүйердің жүрегіне жағылған достықтың шырағы болсын!

332

Алматыда 28-ші Қысқы Универсиаданың алауы тұтанды. Төрткүл дүние көз тігетін шараның ашылу салтанаты үш сағатқа жуық созылды. Алматыдағы осы бір тарихи сәтті тамашалауға келгендердің санында шек жоқ. Алатау бөктеріндегі аламанда халқымыздың мәдениеті мен тарихынан сыр шертетін қойылым сахналанып, инновациялық технологиялар қолданылды. Дүбірлі доданы Мемлекет басшысы Нұрсұлтан Назарбаев салтанатты түрде ашып, спортшыларға сәттілік тіледі.

Ел есінде қалатын 11 күнді өткізу үшін 5 жылдан аса дайындық жүргізілді. Спорттың 12 түрі бойынша 57 елден келген 2 мыңнан астам спортшы өзара бақ сынайды. Қысқы Универсиада Алматыдағы 8 спорттық нысанда өтеді. Оның екеуі осы жарыс үшін арнайы салынған. Солардың бірі – «Алматы Арена» кешені. Жаңа нысан көлемі бойынша Орта Азиядағы ең үлкен мұз сарайы саналады.

Кейін жұрт игілігіне жарайтын заманауи спорттық нысандардың құрылысына басымдық берген ұйымдастырушылар Универсиаданың ашылу жəне жабылу салтанатын қарапайым етіп өткіземіз деп о бастан ескерткен болатын. Шетелден жұлдыз шақырып шашылып, ас та төк салтанатқа бұл жолы жол жоқ. Алайда қыруар қаржы жұмсамай-ақ көптің көңілінен шығуға болатындығына көрерменнің көзі жетті.

Көк байрақ көкке көтеріліп, əнұран шырқалды. Дүбірлі додаға келген 2 мың спортшыны стадион үлкен ықыласпен қарсы алды. Ал, қазақстандық құрамаға жанкүйерлер аяғынан тік тұрып құрмет көрсетті. Көрермен қауым Ұлы дала елінің тарихынан сыр шертетін театрландырылған қойылымды тамашалады. Негізінде еліміз Универсиадаға 1993 жылдан бері қатысып, тәжірибе жинақтады. Осы қысқы сайыстар аралығында еліміздің қоржыны 43 жүлдемен толыққан.

Мемлекет басшысы Нұрсұлтан Назарбаев спортшыларымызға қолдау көрсетіп, салтанатты шараның шымылдығын түру үшін «Алматы Аренаға» арнайы келді. Талай жұрт тағатсыздана күткен доданы көруге келген мәртебелі меймандарға да төрден орын табылды. Солардың бірі – Біріккен Араб Әмірлігінің шейхы.

Нұрсұлтан Назарбаев қазақ елін қолдай келген əр қонаққа ризалығын білдіріп, спортшыларға сәттілік тіледі.

Нұрсұлтан Назарбаев, Қазақстан Республикасының Президенті:

— Қысқы Универсиада Тәуелсіз Мемлекеттер Достастығы аумағында тұңғыш рет біздің елімізде өткізілуде. Бұл – Халықаралық студенттік спорт федерациясының құрамына кіретін 171 елдің Қазақстанға деген сенімі мен құрметінің белгісі. Біз 2011 жылы 7-ші қысқы Азия ойындарын табысты өткіздік. Көптеген спорт түрлері бойынша талай әлем чемпионаттары мен біріншіліктерін қабылдадық. Универсиада қарсаңында Алматыда бірнеше жаңа стадион мен айшықты Атлеттер ауылы салынды. Мұның бәрі – отандық спорттың инфрақұрылымына салынған орасан инвестиция. Меймандарымыз байрақты бәйге кезінде еліміздің қонақжайлығына көңілі толып, таңғажайып табиғатына көз қанықтырады деп сенемін.

Расында да, Қазақстанның дүбірлі дода өткізуде тәжірибесі жоқ емес. Соның бірі – Елбасы сөз еткен 7-ші қысқы Азиада ойындары. Сол кезде көптеген мамандар «ұйымдастыру деңгейі Олимпиада ойындарына пара-пар болды» деген пікір айтып, төбемізді көкке жеткізген болатын. Спортшыларымыз да алтын, күміс, қола жүлдені күреп тұрып алып еді. Аты алысқа кеткен бұл жолғы спорттық бәсекенің де бəсі жоғары. Дайындық та осал емес.

Нұрсұлтан Назарбаев, Қазақстан Республикасының Президенті:

— Ко дню открытия Универсиады мы шли более пяти лет. Через спорт, науку и культуру мы хотим донести до каждого континента казахстанскую формулу толерантного развития. Именно поэтому ежедневно нарастал темп организаторских работ. Именно поэтому с таким усердием строился этот Ледовый дворец и другие объекты Игр. Недавно зарубежные эксперты меня спросили: «А что, если в Алматы зимой не будет снега?» Я сказал: «Спокойно, привезем из Астаны». Снега и гостеприимства в Казахстане хватит на всех. Алматы уже сейчас ставит безусловные рекорды. Здесь впервые в истории проведения зимних Универсиад построена Атлетическая деревня. В то же время мы проводим самые экономичные и компактные Игры. Инвестиции, вложенные в этот проект, пойдут на благо казахстанцев. Арены станут центрами притяжения для массового спорта. Атлетическая деревня превратится в новый микрорайон с доступным социальным жильем для более 1700 семей.

Универсиадаға арнайы салынған спорттық нысандардың бірегейлігі де шетелдік меймандар тарапынан елеусіз қалмады. Əдетте байсалдылығымен ерекшеленіп жүрген Халықаралық студенттік спорт федерациясының президенті бұл жолы қазақ тілінде жастарды жігерлендірді.

Сонымен, шараның шарықтау шегінде еліміздің əр өңірін аралап, 22 мың 300 шақырым жол жүріп келген 16 алау Алматыда бірігіп, Универсиада алауы жағылды. Студенттер жарысы ресми түрде басталды.

Мемлекет басшысы Нұрсұлтан Назарбаев Қысқы Универсиаданы ашық деп жариялады.

Нұрсұлтан Назарбаев, Қазақстан Республикасының Президенті:

— Универсиада алауы әрбір спортшы мен жанкүйердің, біздің елдеріміздің барша азаматтарының жүрегіне жағылған достықтың шырағы болсын! Адал сайыста тек жүзден жүйрік, мыңнан тұлпарлардың ғана мерейі үстем болсын! Баптарыңыз келісіп, бақтарыңыз шапсын! Әлем көз тіккен айтулы спорт мерекесі құтты болсын!

Бұл тарихи сəтті 80 елден шамамен 1 млрд көрермен тікелей трансляция арқылы тамашалады. Спорт ойындарының əрқайсысы əлемге танымал телеарналар арқылы көрсетілмек. Бұл байрақты бәсекеге жаһан жұртының көз тігуі бекер емес. Универсиада ойындары Олимпиададан кейінгі ең ірі спорттық шара саналады. Сондықтан бұл күндері ең алдымен ел абыройы сынға түсетіні анық. 1960 жылдан бері əлемнің жиырма жеті елін аралап, мыңжылдық тарихы бар Алматыға жеткен Универсиада 8 ақпан күні аяқталады. Олай болса Алатаудың бөктеріндегі аламан отандық спортшыларымыздың томағасын сыпырып, ел спортының тарихына жаңа есiмдердi тiркейтініне сенім мол.

Авторлары: Елдар Бақпаев, Еділ Ермекбаев, Жанұзақ Боранбаев, Хасен Омарқұлов 

24.kz




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *