Жутум дегән жут оғли

Шахризада САБИТОВА,«Уйғур авази»/ Бүгүн сәдиқиниң немә екәнлигини билмәйдиған, закатини қизғинип бәрмәйдиған, хошнисиниң әһвалиға көйүнмәйдиған, житимниң һәққини өзидин соримайдиғанларға қариғанда, миңқәтлик шүкрики, жүригидә имани бар мәрт-мәрданә инсанлар аз әмәс. Кәтмән йезисиниң чоң жигитбеши, йезиниң гүллинишигә өз үлүшини қошқан ишбиләрмән, милләтпәрвәр оғлан Камалдин ака Шәйхиев шулар җүмлисидиндур.1947-жили Шәйихи Ғоҗамбәрдиев билән Хасийәтхан Савутоваларниң аилисидә чоң хошаллиқ йүз берип, баһарниң иллиқ күнлири йүзидин нури төкүлгән наресидә Камалдин дунияға келиду. Аилидә бәшинчи пәрзәнт болсиму аддий деханлар һәрбир дунияға кәлгән гөдәкләрни дәсләпки пәрзәндидәк күтүп, бар меһир-муһәббитини айимиған. Шуңа болса керәк, Камалдин акиниң бойида яхши хисләтләр муҗәссәмләнгән. Кәтмән йезисидики оттура мәктәпкә барған Камалдин замандашлири арисида өзиниң зерәклиги, билимгә болған хуштарлиғи, спортқа болған қизиқиши түпәйли пәриқлиниду. 1966-жили мәзкүр мәктәпни тамамлиған яш жигит дәсләп Вәтән алдидики һәрбий борчини ада қилиду. Андин жутиға қайтип келип, «Қизил Туғ» колхозида колхозчи, комсомол тәшкилатиниң кативи болуп ишләйду. Шуниңдин кейин икки жил йезилиқ Мәдәнийәт өйини  башқуриду. Андин шу колхозда ихтисатчи, 1981 — 1986-жиллири колхоз рәисиниң орунбасари хизмәтлирини атқуриду. Тәбиитидин ишбиләрмән, тәшкилатчи һәм көпчилик билән тил тепишишни билидиған оғлан 1986-жили колхоз рәиси болуп тайинлиниду.

Камалдин Шәйхиевниң шу жиллири атқурған ишлирини яхши билидиғанлар бизниң пикримизни тәстиқләйду дәп ойлаймиз. Чүнки Камалдин ака нәқ шу жиллири Кәтмән йезисиниң тәрәққиятиға, гүллинишигә өзиниң биркишилик һәссисини қошти.

Атап ейтсақ, рәисниң беваситә тәшәббуси түпәйли қолға кәлтүрүлгән чоң утуқларниң бири — 1987-жили қәд көтәргән 1140 орунлуқ мәктәптур. Бийил мәзкүр билим дәргаһи һулиниң селинғиниға 30 жил бопту. Шундақла шу жиллири «Турушлуқ өй – 91» дөләт программиси асасида 30дин ошуқ турушлуқ өй селинип, пайдилинишқа берилди. Униңдин бөләк колхозниң чарвичилиқ саһасидиму хелила сезиләрлик илгириләшләр болди. Бу хилдики көрсәткүчләрниң ишбиләрмән вә келәчәкни пәмләшни билгән Камалдин акиниң билим-қабилийити билән мол иш-тәҗрибисиниң нәтиҗисидә қолға кәлгәнлигини испатлап олтиришниң һаҗити болмиса керәк.

Пүткүл аңлиқ һаятини йезиниң, егиликниң иҗтимаий-ихтисадий тәрәққияти үчүн сәрип қилған Камалдин ака йәтмишниң төригә йәтсиму, жутдашлири униң ярдимигә техила муһтаҗ. Бийил он жил болди, Камалдин ака жутдашлириниң тәкливи билән жигитбеши хизмитини җандили билән атқуруп келиватиду. Қандақ әһвалда болмисун, у дайим кө алдида. Йәни буйруқ берип қоюп, өзи чәттә турувалмайду. Хасийәтлик җүмә күни яшларниң бешини мечитта қошуп, җүмә намазға барса, әтиязда йезиниң әтрапини тазилап, рәткә кәлтүрүш ишлириға һәммидин бурун өзи йәң түрүп киришип кетиду. Йезидики тәминати начар аилиләргә, житим вә йерим житимларға қолидин кәлгиничә ярдәм қилип, сахавәтлик ишларни әмәлгә ашуриду. Милләтпәрвәр оғлан шундақла миллий нәшримиз — «Уйғур авази» гезитиға муштири топлаш мәвсүмидә жутдашлириниң өмлүгини, миллий ғуруриниң үстүнлүгини йәнә бир мәртә дәлилләйду. Әң муһими, у жут, хәлиқ мәнпийитигә аит әмәлгә ашурған ишлирини миннәт қилишни билмәйду.

Бүгүнки күндә Камалдин ака рәпиқиси Пәмихан Аюпова билән үч оғул вә икки қизни җәмийәткә лайиқ инсанлардин қилип тәрбийиләп, қатарға қошқан әзиз вә қәдирдан ата-анилардин. Нәврилирини иманлиққа чақирип, дәстихандин дуа қилмай турғузмайдиған сөйүмлүк бова. Он икки нәвридин кейин қучқан икки чәврисиниң тили «бова» дәп чиқип, униң бешини техиму көкләргә көтириду.

Көпчиликниң хизмитини қилип, дуасини алған Камалдин Шәйхиевни тәвәллуди билән чин қәлбимиздин тәбрикләп, узақ өмүр, бәхитлик қерилиқ тиләймиз.

Уйғур наһийәси.




Добавить комментарий

Ваш e-mail не будет опубликован. Обязательные поля помечены *