Кәмтарлиғи билән һөрмәтлик

Алимҗан Йолдашев мениңдин бир жил кейин, йәни 1985-жили «Асфальтобетон» ишләпчиқириш карханисиға ишқа киргән еди. Дәсләп эколог, инженер болған у һазир баш метролог лавазимини егиләватиду. Униң билән биллә бир карханида ишләп келиватқинимға мана, һәш-пәш дегичә 32 жил толупту. Шу жиллар җәриянида униң қапақ түрүп сөзлигинини көрмидим. Пәқәтла күлүмсирәп жүргинила жүргән, халас. Коллектив арисида силиқ-сипайә муамилиси билән һөрмәтлик кәсипдишим өзи, аилиси тоғрилиқ чиш йерип сөзләп бәргән бәндә әмәс.  Шундиму өзәмниң биливалғанлиримни қисқичә ейтип өтәй: Алимҗан Һошурахун оғли Йолдашев 1952-жили Яркәнт шәһиридә хизмәтчи аилисидә дунияға келиду. Дадиси Һошурахун Йолдашев «Октябрьниң 40 жиллиғи» колхози рәисиниң орунбасари болуп хелә жил ишлигәндин кейин тәҗрибилик йеза егилиги хадими сүпитидә «Бирлик» колхозиниң рәислигигә тайинлайду. Һошурахун Йолдашев та һөрмәтлик дәм елишқа чиққичә «Бирлик» колхозиниң һәммә тәрәптин илгириләп, йүксилишигә бар күч-қувәт, ғәйритини сәпәрвәр қилиду.

Алимҗан Йолдашев болса, Яркәнт шәһиридики Крупская намидики рус оттура мәктивини 1969-жили пүтирип, «Октябрьниң 40 жиллиғи» колхозида дәсләпки иш-паалийитини башлайду. Андин Алмута технология институтини инженер-технолог мутәхәссислиги бойичә пүтирип, Яркәнт шәһиридики ашлиқ қобул қилиш комбинатида цех башлиғи лавазимини егиләйду.

Һошурахун ака һөрмәтлик дәм елишқа чиқиши биләнла Алмута шәһиригә көчүп келиду. Шуңлашқа Алимҗан дәсләп шәһәрдики ун тартиш комбинатида инженер-технолог болуп ишқа орунлишиду. Аридин бираз вақит өтүп «Асфальтобетон» ишләпчиқириш карханисиға ишқа қобул қилиниду вә, жуқурида ейтқинимиздәк, һазир «Асфальтобетон-1» ҖЧЙниң баш метрологи лавазимида ишләп кәлмәктә.

Алимҗанниң рәһбәрлигидики бөлүм карханида өлчәш, тәхсим қилиш, тәкшүрүш вә асфальтниң тәркивигә қошулидиған һәр түрлүк қетилмиларни мөлчәр билән тәхсим қилиш аппаратлириниң ишлишини тәминләйду. Шундақла чиқириливатқан асфальтобетон, қаримай, эмульсия мәһсулатлири сүпитиниң үстүн болушини тәминләйду.

Алимҗан башқурувтақан бөлүм Алмута шәһиридики ишләпчиқириш карханилири мәһсулатлириниң көргәзмисигә һәр жили актив қатнишип, Алмута шәһәрлик һакимийәтниң Пәхрий ярлиқлирини елишқа муйәссәр болуп кәлмәктә.

Алимҗан өз кәспигә җавапкәрлик билән қарайдиған, тиришчан, көп издинидиған қабилийәтлик мутәхәссис. Қол астида ишләватқан инженерларниң билимини мукәммәлләштүрүшигә чоң әһмийәт бериду. Уларни қисқа муддәтлик билимини ашуруш курслириға пат-патла әвәтип туриду.

Униң паалийитидин «Асфальтобетон-1» җавапкәрлиги чәкләнгән йолдашлиғиниң тәрәққиятиға қошқан чоң үлүши көрүнүп турсиму, кәмтарлиғиға елип, өзини махташни әсла яқтурмайду. Шундиму, униң 65-баһарини қарши еливатқанлиғини банә қилип, мошу мақалини йезишни тоғра көрдүм.

Имәрғәли БУРҺАНДИНОВ, «Асфальтобетон-1» ҖЧЙ Энергетика бөлүминиң башлиғи.




Добавить комментарий

Ваш e-mail не будет опубликован. Обязательные поля помечены *