Өз дәвриниң қәһриманлири

8

Дөләт рәһбириниң қатнишиши билән өткән «Қазақстандики 100 йеңи исим» учришишиға җумһурийитимизниң барлиқ регионлиридин көрнәклик алимлар, кәшпиятчилар, музыкантлар, җәмийәт әрбаплири жиғилди. Намзатларни бирнәччә ай мабайнида пүткүл мәмликәт онлайн-аваз бериш арқилиқ таллавалди.

Дөләт рәһбири өз сөзидә дунияда йүз бериватқан өзгиришләр тоғрилиқ сөзләп бәрди вә йеңи шараитларға көнүкүшниң зөрүр екәнлигигә диққәт ағдурди.

– Дуния чапсан өзгириватиду, көзүңни жумдуң – көп нәрсини байқимай қалисән, – деди Президент. – Бизниң вақтимиз – дөләтниң дөләт билән, хәлиқниң хәлиқ билән, адәмниң адәм билән риқабәтлишиши. Худди еқинға қарши үзгәндәк, һәрдайим алға илгириләш керәк. Тохтап қалдиң – кәйниңгә кәткиниң.

Президент өз сөзидә шундақла дөләт тилини латин алфавитиға көчириш лайиһисигиму диққәт ағдурди.

– Һазир пән вә мәдәнийәт тоғрилиқ әхбаратниң 70 пайизға йеқини инглиз тилида. Биз үчтиллиқ билим беришкә көчүш тоғрилиқ елан қилдуқ. Яш әвлат һазирниң өзидә инглиз тилини билиду. Латин һәрипигә көчүш бизниң умумий тәрәққий етиватқан әхбарат дуниясиға киришимизни тәминләйду, – деди мәмликәт Президенти.

«Туған жер» – Дөләт рәһбири өз сөзидә диққәт ағдурған йәнә бир лайиһә. У өз шәһириңни вә региониңни қоллап-қувәтләш арқилиқ вәтәнпәрвәрликни тәрәққий әткүзүшкә қаритилған.

Дөләт рәһбири «Қазақстандики 100 йеңи исим» лайиһисини әмәлгә ашурушниң муһим екәнлигигә диққәт ағдуруп, учришиш қатнашқучилириға җәмийәт уларға жүклигән җавапкәрлик тоғрилиқ әслитип өтти.

– Силәр конкурслуқ таллавелиш басқучлиридин өттүңлар, интернет-аваз бериш өткүзүлди. Силәр надир шәхсләрдин һесаплинисиләр. Мустәқиллик силәрниң талантиңларниң гүллинишигә вә келәчәккә йол селишқа имканийәт бәрди. Силәр яшлар үчүн үлгә болусиләр, – деди Нурсултан Назарбаев.

Президент яшларға мураҗиәт қилип, өзи паалийәтчан вә бир мәхсәткә интилған кеңәш яшлириниң вәкили болған күнләр тоғрилиқ хатирилири билән ортақлашти.

– Мениң мутәхәссислигим бойичә инженер-металлург екәнлигимни билисиләр, бизни, 100 қазақстанлиқ жигитни, Украинида оқушқа вә заводта ишләшкә әвәтти, – деди Дөләт рәһбири. – Балиларниң һәммиси авуллардин чиққан вә илгири унчилик чоң карханиларни көрмигән. Биз 1500 градус температурида пәчтин ериқ болуп аққан иссиқ металл йенида турдуқ. Көйүп кәтмәслик үчүн қелин кийинивелишқа тоғра кәлди, қолумизда еғир әсваплар…

Нурсултан Назарбаев сөзиниң ахирида лайиһә қатнашқучилириниң һәммисигә муваппәқийәт тилиди вә уларни қолға кәлтүргән утуқлири билән чәклинип қалмаслиққа чақирди.

Бу күни «Қазақстандики 100 йеңи исим» лайиһисиниң қәһриманлири – врачлар, спортчилар, музыкантлар, кәшпиятчилар, җәмийәт әрбаплири, қутулдурғучилар, һәрбийләр вә башқа кәсип-саһа вәкиллири сәһнигә чиқип, өз паалийити билән ортақлашти, утуққа йетиш сирлири тоғрилиқ ейтип бәрди.

«Қазақстанниң 100 йеңи исми» лайиһисидә ғалип чиққан 102 адәмниң арисида икки уйғур жигити бар. Улар: режиссер-сценарист Әзиз ЗАЙИРОВ («Җәмийәт» номинацияси бойичә аваз бәргүчиләрниң 12 177 авазиға егә болди, 10-орун) билән врач Һесамдун ҺӘРӘМОВ («Медицина» номинацияси бойичә аваз бәргүчиләрниң 11 356 авазиға егә болди, 22-орун). Шу мунасивәт билән уларни қизғин вә сәмимий тәбрикләп, ишиға — утуқ, аилисигә хатирҗәмлик тиләймиз.




Добавить комментарий

Ваш e-mail не будет опубликован. Обязательные поля помечены *