Цифрлық жаһандану кезеңіндегі жоғары оқу орны кітапханаларының даму тенденциялары

542

Жуырда Абай атындағы Қазақ ұлттық педагогикалық университетінің 90 жылдық мерейтойы аясында ҚР БҒМ-нің Республикалық ғылыми-педагогикалық кітапханасы мен Университеттің Ғылыми кітапханасының ұйымдастыруымен «Цифрлық жаһандану кезеңіндегі жоғары оқу орны кітапханаларының даму тенденциялары» тақырыбында жоғары білім беру кітапханалары басшылары мен қызметкерлеріне арналған халықаралық ғылыми-практикалық семинар өтті.

Семинардың пленарлық бөлімін ашқан Университеттің оқу-әдістемелік жұмысы жөніндегі проректоры Ғабит Кенжебаев алғы сөзінде: «Жоғары оқу орындарын цифрландыру дәуірінде кітапханалардың алатын орны ерекше екенін атап өткім келеді. Себебі, кітапхана ақпараттарды жинап, сақтаушы орын ғана емес, оқырмандарды өз бетінше білім алуға, әр түрлі ақпарат көздерімен жұмыс істеуге үйрететін, олардың ізденіс әрекеттерін, ғылыми-зерттеу қызметін дамыта отырып, сауатты пайдаланушыны қалыптастыратын мекеме. Сондықтан да білім алушыларды цифрлық ақпараттық кеңістікте жетелеуде кітапхана ісінің басқалардан озық тұруы міндет деп ойлаймын», -деді.

ҚР БҒМ-нің Республикалық ғылыми-педагогикалық кітапханасының директоры Айман Насырова қатысушыларды семинардың ашылуымен құттықтап, цифрлық әлемдегі кітапханалардың дамуы туралы «Цифрлық жаһандану жағдайында жоғары оқу орындары кітапханаларының даму үрдістері» тақырыбында баяндама жасады.

Сөз соңында Қазақстан республикасы жоғары оқу орны кітапханаларының үздік қызметкерлерін, солардың ішінде ҚазҰПУ-дың Ғылыми кітапхана директоры Нүргүл Имансыдықоваға, кітапхананың эксперт менеджері Нәйля Сексенбаеваға Білім және ғылым министрлігінің грамотасымен марапаттады.

Халықаралық ғылыми-практикалық семинардың дискуссиялық мәжілісіне ҚР жоғары оқу орны кітапханаларының басшылары белсене қатысып, тәжірибелерімен алмасты. Жалпы семинар бағдарламасына мәдениет, білім беру салаларының және Ресей, Қырғызстан, Түркия, Қытай және Қазақстан жоғары оқу орны кітапханалары басшыларының 50-ден астам баяндамалары кірді.

Римма Жанбаева




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *