Моңғол әншісі Батмөнхийн Сарантуяа «Мен бақыттымын» дейді

373

12 мамырда Алатау дәстүрлі өнер театрында Моңғолияның еңбек сіңірген әншісі  және «XX ғасырдың үздік әншісі атағының» иегері Батмөнхийн Сарантуяаның «Мен бақыттымын» атты ән кеші өтті. Концертті ұйымдастырушы NT студиясының продюсері М. Нұрбақыт концерттік шарада   «Рэндом» тобының жанды музыкалық сүйемелдеуімен Б. Сарантуяа  табиғи дауыста ән орындағанын айтады.

Әнші  екі-үш сағатқа жалғасқан концерттік шарада  моңғол, орыс және қазақ тілінде әндер орындады. «Мен бақыттымын» деп ән салған Б. Сарантуяа өмірде екі қыз, бір ұлдың анасы екен. Биыл ол 48 жасқа келді.  Өнер иесінің концерттік бағдарламасында әнші Шахизада мен Бек  «Не болады екеміз» атты дуеті мен бірнеше қазақ әндерімен концертті қыздыра түсті. Ал моңғол әншісі Б. Сарантуяа жан құрбысы С. Тикамен бірге қазақша дует орындады. Концерттік шара екі елдің мәдени байланысын жақсартып, достығын нығайтуға септігін тигізбек. Кешке қатысушы әншілер  өнердің ұлтқа бөлінбейтіндігін айтады. Бұдан кейін әншілер арасында әріптестік қарым-қатынас жандана түсетін сыңайлы. Әнші Шахизада бес жыл бұрын Моңғолия елінде  «Бал сезім» атты бейнебаянын түсіргенде Сараның қолдауына ие болыпты. Содан бері олар ән әлемінде жақын таныстар болып келеді.

«Өнерде әдемілігімен, адамгершілігімен, өнерге деген зор сүйіспеншілігімен көрініп жүрген Сара алты жыл бұрын біздің елде алғаш концертін қойды. Сол кезде көрермен ретінде қатыстым. «Азия даусында» бас жүлде жеңіп алғанын білеміз. Ол өнерді жоғары деңгейде алып жүрген әнші. Оның бойында жағымды энергия мен тылсым  ғажайбы бар адам. Өнерге ұқыптылық пен тазалықпен қарайды. Бүгінгі концерт барысында  Сара екеуміз Моңғолияда жеке ән кешін ұйымдастырсақ деп жоспарладық. Шілде айында Астанада Сараның ән кеші өтеді. Ұсыныстар келіп түсті. Мүмкін сол концертте де бірге өнер көрсетеміз деп ойлаймын. Бұл біздің өнердегі ынтымағымыз бен әріптестік сенімімізді арттыра береді»,-деп  Шахизада ханым кеш барысында концерттің жақсы өткенін жеткізді.

Б. Сарантуяа 32 жыл сахналық өмірінде 22 альбом шығарып, көптеген хит әндердің орындаушысына айналды. Ол шоу бизнес әлемінде табысты әйелдердің қатарынан ойып орын алады. Алғаш әншілікке бет бұрып, карьера жасауға түрткі болған оқиға 1993 жылы Қазақстанда өткен «Азия даусы» байқауының жеңімпазы атануы себеп болыпты.

«23 жасымда Қазақстанда жүрілген «Азия даусы» жобасында гранпри жеңіп алдым. Бұл карьерамның басталуына оң ықпал етті. 2012 жылы  Қазақстандағы Моңғолия Елшілігінің қолдауымен  сәуірде Алматы қаласындағы  Ө.А. Жолдасбеков атындағы Студенттер сарайында, Астанада Конгресс Холда кешім өтті. Жастардың ықыласы ерекше болды. Мен де өз шәкірттеріммен бірге келген едім. Сол концертте моңғолдың дәстүрлі әндерін орындадық. Бұл жолы репертуардағы жаңа әндермен Моңғолиядан осында қоныс аударған ел-жұртқа, Моңғолиядан келген студент жастарға «Мен бақытты» екенімді айтқым келді.  М. Нұрбақыт, Тикалардың ұйымдастыруымен концертіміз өтіп жатыр. Екі музыкантымыз паспорт мәселесімен келе алмады. Олардың орнында Қанат гитарада және де орыс азаматы музыкада ойнайды.  Жалпы, моңғол-қазақ мәдени байланысын жақсарта түссек деймін. Кеш қонақтарына, Роза Рымбаеваға алғыс айтамын. Өзі Кореяға кетсе де, инстаграмда, фейсбукте шығармашылық кешіме қолдау білдіріпті. Осы тұрғыда, менің жақын араластын құрбым Тика екеуміз қазақ тілінде «Ұнайды маған» әнін орындамақпыз»,-деп Сарантуяа кеш барысындағы көңіл-күйінен сыр бөлісті.

Моңғол әншісі Б. Сарантуяаның Алматыдағы ән кеші көрермен жүрегінен жол тапқаны анық. Концерт барысында жастар қауымы  моңғолша әндерді Сарамен бірге айтып, ерекше ынталы отырды. Дегенмен, көзі қарақты көрерменнің дені әншінің орындауында аз да болса, моңғол ұлттының дәстүрлі әнін тыңдағысы келгені байқалған еді. Бірақ,  Б. Сарантуяа «Мен бақыттымын» шығармашылық ән  кешінде заманауи әндерге басымдық танытты.

Алтын Бейімбетқызы




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *