Мемлекеттік хатшы Екінші Еуразиялық әйелдер форумына қатысты

397

2018 жылғы 20 қыркүйекте Санкт-Петербург қаласында ҚР Мемлекеттік хатшысы Г.Н.Әбдіқалықова «Әйелдер жаһандық қауіпсіздік пен орнықты дамуды жақтайды» тақырыбымен өткен Екінші Еуразиялық әйелдер форумына қатысты.

Форумды РФ Федералдық Жиналысы Федерация Кеңесі мен ТМД-ға қатысушы мемлекеттер Парламентаралық Ассамблеясы ұйымдастырды. Оған РФ Президенті В.Путин, халықаралық ұйымдар басшылары, сондай-ақ әлемнің 100 елінен 500-ден астам өкіл қатысты.

Қазақстан делегациясы құрамына Парламент депутаттары, мемлекеттік органдар басшылары, қоғамдық ұйымдар өкілдері кірді.

Құттықтау сөзінде Гүлшара Әбдіқалықова ҚР Президенті Н.Назарбаевтың «Әлем. XXI ғасыр» манифесінде айтылған: «Өткен ғасырлардың қасіретті қателіктерін қайталауға жол бермей, әлемді соғыс қатерінен түпкілікті арылту үшін үкіметтердің, саясаткерлердің, ғалымдардың, бизнесмендердің, өнер қайраткерлерінің және бүкіл әлемдегі миллиондаған адамның күш-жігерін жұмылдыру қажет» деген сөзіне назар аудартты.

Мемлекеттік хатшы қуатты экономика құру, тұрақты және әділетті қоғам қалыптастыру үшін әйелдер экономика өмірінің барлық саласына толыққанды атсалысуы қажет екенін атап өтті.

– Бүгінде біздің ел Орталық Азия мен Ауғанстандағы қауіпсіздікті қамтамасыз етуге айрықша көңіл бөліп отыр. Біз Тәжікстан мен Қырғызстандағы қақтығыстарды жоюға қатыстық, Иран мен Сирия келіссөздері үдерістеріне орын ұсындық, – деді Мемхатшы.

Сол күні түстен кейін ҚР Мемлекеттік хатшысы Гүлшара Әбдіқалықова БҰҰ-Әйелдердің атқарушы директоры, БҰҰ Бас хатшысының орынбасары Фумзиле Мламбо-Нгкука және «Әйелдер жиырмалығының» (W20) негізін қалаушы әрі президенті Гюльден Тюрктанмен екіжақты кездесулер өткізді.

Кездесулер барысында өзекті әлеуметтік-экономикалық және мәдени-гуманитарлық түйткілдер, әйелдердің мүмкіндігін одан әрі арттыру мәселелері, бейбітшілік пен қауіпсіздікті нығайту мақсатымен халықаралық және өңірлік бастамалар көтерудегі олардың белсенді рөлі талқыланды.




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *