Ғалымдар «Мәңгілік Ел» идеясының тарихы мен болашағы туралы ой қозғады

622

Назарбаев орталығында «Мәңгілік ел идеясы: тарихы мен болашағы» атты республикалық ғылыми конференциясы өтті. Қазақстанның үшінші жаңғыруы – қоғамның рухани жаңаруы міндеттері мәнмәтінінде өткізілген конференцияны Қазақстан Республикасының Тұңғыш Президенті-Елбасының кітапханасы ұйымдастырды. Бұл туралы «ҚР Тұңғыш Президенті — Елбасының кітапханасы» ММ Жұртшылықпен байланыс қызметі хабарлайды. 

Іс-шараны конференцияның модераторы, Елбасы кітапханасы директорының бірінші орынбасары, саяси ғылымдарының докторы, профессор Әмірхан Рахымжанов ашып, қатысушыларға сәттілік тіледі.

Құрметті ғылыми конференцияға қатысушылар! Сіздерді «Мәңгілік Ел: тарихы және болашағы» тақырыбындағы ғылыми-тәжірибелік конференциясының ашылуымен құттықтаймын! Біз небір тар жол, тайғақ кешуден де, неше түрлі сыннан да бірлік пен ынтымақтың арқасында аман өткен елміз. Сондықтан да барымызды бағалап, киемізді қастерлей білетін, ұлтымыздың бағына туған алыптарымызды ардақтап, қадірін түсінетін халықпыз. Ширек ғасыр ішінде асқар асулар мен биік белестерді бағындырып, еңселі елге айналуымыз Елбасының кемеңгерлігі мен көрегендігінің арқасында екендігін әрбір қазақстандық жақсы біледі. Елбасының жыл сайынғы Жолдауларын асыға күтіп, стратегиялық бағдарламалары мен жаһандық бастамаларының іске асырылуына әр ұжым, әр азамат өзінің хал-қадірінше атсалысуға тырысады. Себебі, біздің еліміз жеткен табыстар мен болашақ жоспарлар – Тұңғыш Президентіміз, Елбасы Нұрсұлтан Әбішұлы Назарбаевтың есімімен байланысты. Біз Президентіміздің «Мәңгілік ел» жолындағы дана саясатының арқасында бүгінде дамыған елдер қатарына жеттік. Халықаралық және әлемдік деңгейде абыройлы, беделді мемлекет атандық. Кең байтақ қазақ жері татулықтың үлгісіне айналып, дамудың қазақстандық жолы қалыптасты. Енді егемен еліміз дамудың жаңа кезеңіне аяқ басты. Ұлтты ұлы мұраттар жетілдіреді. Ендеше Мәңгілік Ел болу жолындағы асқақ мұратымыз орындалсын!

Конференцияда сөз алған Қазақстан Республикасы Жоғарғы сотының жанындағы Сот төрелігі академиясының «Әлеуметтік-гуманитарлық пәндер» кафедрасының меңгерушісі, философия ғылымдарының докторы, профессор Төлеуғали Бүрбаев ««Мәңгілік Ел» жалпы ұлттық идеясының құндылықтары Қазақстан қоғамын рухани жаңғыртудың басты негіздері ретінде» баяндамасында ұлттық идеяға қойылатын талаптарға тоқталды.

«Мәңгілік Ел» идеясы негізінде қоғамда көптеген жұмыстар жүргізілуде. «Мәңгілік Ел» идеясын қалай ұлттық идеяға айналдырамыз? Осы тұста ұлттық идеяға қойылатын талаптарға қысқаша тоқталып өтсем. «Мәңгілік Ел» идеясы – алауыздық пен әлеуметтік жүктемеге жол бермейді. Ұлттық идеяның ішкі және сыртқы өлшемдері бар. Ішкі өлшемдер елдің даму бағыты, деңгейі, әлеуметтік ахуалы, құндылықтар жүйесіне байланысты болса, сыртқы өлшемде оның басқа елдермен ынтымақтастық негізде қарым-қатынасы көрініс табады. Ұлттық идея әрқашан болашаққа бағытталуы әрі өзекті болуы тиіс… Ұлттық идеяның ішкі мәні – даму, өзгеру, жаңғыру. Мемлекет пен қоғам үнемі өзгеріп, жаңғырып, дамыса, онда ұлттық идея да жасампаз болады. Өткен тарих пен бүгінгі даму сабақтастығының тоғысар сәті де – осында.

Қоғамдық идеал – ұлттық құндылық. Мәңгілік ел идеясы алдымен ұлттық мемлекеттілікпен, оның ажырамас рәміздері ретіндегі қазақтың ұлттық қалпы мен жалпыхалықтық құндылықтарымен астасуы қажет. Жетістік – кеңесе білген жерде, бірлік пен тірлік бар жерде. Елбасы өз Жолдауында атап көрсеткендей, Жалпыұлттық идея – қазақтың Ұлттық Шаңырағы – Қазақстан құт пен берекенің, ынтымақ пен ырыстың ошағына айналмақ! «Мәңгілік Ел» қоғамдық идеалын қалыптастыруда қай-қайсымыз қолдан келер қайраткерліктен қапы қалмайық! — деді өз баяндамасында М.В.Ломоносов атындағы Мәскеу мемлекеттік университетінің Қазақстандағы филиалының профессоры, тарих ғылымдарының докторы, профессор Алтайы Оразбекова.

Конференцияға танымал отандық ғалымдар, академиктер, профессорлар, доценттер, сонымен қатар докторанттар мен магистранттар қатысты.

Қазақстан Республикасының Тұңғыш Президенті — Елбасы кітапханасының, Қазақстан Республикасы Жоғарғы соты жанындағы Сот төрелігі академиясы, ҚР БҒМ Ғылым комитеті Философия, саясаттану және дінтану институты, ҚР Ұлттық қауіпсіздік Комитеті Шекара қызметі академиясы, Л.Н. Гумилев атындағы Еуразия ұлттық университеті, Әл-Фараби атындағы Қазақ Ұлттық университеті, М.В.Ломоносов атындағы Мәскеу мемлекеттік университетінің Қазақстандағы филиалы, С.Сейфуллин атындағы Қазақ агротехникалық университеті, Е.Бөкетов атындағы Қарағанды мемлекеттік университеті, «Жастар» ғылыми-зерттеу орталығы, ҚР Ұлттық музейі, «Өрлеу» АҚ Павлодар облысы филиалы мұражай бөлімі, ЦИОМ (Қоғамдық пікір зерттеу орталығы), «Тұран» білім корпорациясы, «Тұран-Астана» университетінің қызметкерлері мен өкілдері конференцияда Мәңгілік ел идеясына байланысты жұмыстардың тарихи, экономикалық, саяси, философиялық, мәдени, әлеуметтік, құқықтық және басқа да қырларын талқылады.

Конференция жұмысының қорытындысы бойынша «Қазақстан жолы: Мәңгілік Ел» монографиясын шығару жоспарланған.




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *