​Түркістан облысында соңғы 10 айдың ішінде 2,5 мың адамнан қант диабеті анықталған

1825

14 қараша — әлем жұртшылығы үшін қант диабеті ауруына қарсы күрес күні. Cол себепті, Түркістан облысының денсаулық сақтау басқармасының ұйымдастыруымен Түркістан қалалық орталық емханада «Ашық есік» күні өтуде, — деп хабарлайды kazgazeta.kz облыстық денсаулық сақтау басқармасының баспасөз қызметіне сілтеме жасап.

Қант диабеті (Сусамыр) дертімен күрес аясында, науқас Түркістандықтар облыстан арнайы келген эндокринолог мамандардан кеңес алып, тұрғындар қандағы қант деңгейін анықтау анализін жасатуда. Қант диабеті – кең тараған қауіпті ауру. Жазылмас дертке шалдыққандар саны жыл өткен сайын көбеюде. Бүгінде денсаулықты сақтаудың, кез- келген кеселдің алдын алудың ең тиімді жолы — скрининг. Осы арқылы халықтан кең тараған ауру түрлері ертерек анықталып, ұтымды емдеу ісі жүргізілуде. Түркістан облысында соңғы 10 айдың ішінде 2,5 мың адамнан Қант диабеті анықталған. Бұл науқастар «Денсаулық» басқармасы аясында өткізіліп жатқан тегін скрининг жұмыстары барысында анықталып отыр. 40 пен 70 жас шамасындағы азаматтар тіркелген емханасында скринингтен ақысыз өте алады.
Дәрігерлер 40 жастан асқан, дене салмағы ауыр адамдар мен гипертонияға шалдыққан жандарға қант диабетіне ұдайы тексеріліп отыру керегін ескертеді. Дерттің бұл түрі тұқым қуалайды. Сусамыр ауруы өте күрделі және қатерлі ауру. Қант диабетінің ІІ типі таблеткамен емделсе, І-шісі тек инсулинге көнеді. Түркістан облысында 23 мыңға жуық адам қант диабеті дертіне шалдыққан. Сусамыр дертіне шалдыққандардың 93% -ы 40 -80 жас шамасындағы азаматтар.




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *