Астанада «QAZFORUM — 2018» конференциясы басталды

273

Еліміздің бас қаласы Астанада қазақтілді контентті дамытуға арналған «QAZFORUM — 2018» конференциясы басталды,- деп xабарлайды kazgazeta.kz тілшісі. 

Интернет журналистиканы дамытуда маңызы зор ауқымды шараны ҚР Ақпарат және коммуникациялар министрі Дәурен Абаев ашты.

«Бүгінде қазақтілді сайттардың саны да, салмағы да артып келеді. Уақыт талабына сай өз аудиториясын қалыптастырған бәсекеге бейім порталдардың қарасы көбейіп жатыр. Осы қарқын жалғасса, мемлекеттік тіліміздің мәртебесі өседі», — деді Д.Абаев. — Әлем бір орында тұрған жоқ. Интернет түрлі бағыттар бойынша жан-жақты дамып жатыр. Сол себепті аудиторияға қызықты контент, оқырманға тартымды портал қалыптастыру — бүгінгі заман талабы. Қазір қазақтілді сайттардың өз бағыты қалыптасып келеді. Осы жайт көңілге қуаныш ұялатады. Бүгінде нақты дерегі бар қысқа да нұсқа ақпарат құнды. Осыдан он жыл бұрын біз қазақтілді сайттар болса екен деп ойлатынбыз. Қазір ондай сайттар бар. Саны да аз емес. Енді, сол сайттардың сапасын арттыруымыз қажет».

Ақпарат және коммуникациялар министрі бүгінгі таңда ақпараттық сайттардың мемлекеттік саясатты халыққа таратуда мүмкіндігі зор екенін атап өтті.

Форумда сондай-ақ, ақпараттық кеңістікке қатысты біршама маңызды мәселелер көтерілуде. Balapan» телеарнасының директоры Мақпал Жұмабай балаларға арналған арнаны басқара тұра, балаларға теледидарды ұзақ уақыт қарау зиян екенін ескертті. «Балаға 3 жасқа дейін телеарна көруге болмайды. 3 жастан 7 жасқа дейін 20-30 минут қана, 7 жастан 12 жасқа дейін 30-50 минуттың арасында, ал 12 жастан жоғары балаға бір сағатқа рұқсат етіледі. Бұны өте қатты қадағалау қажет. Себебі оның зардабы үлкен болады», — деді арна басшысы.

 




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *