Атырау облыстық ауыл шаруашылығы басқармасының басшысы тағайындалды

100

Атырау облыстық ауыл шаруашылығы басқармасының басшысы тағайындалды. Ол – Индер ауданы әкімінің орынбасары лауазымын атқарып келген Қайрат Нұрлыбаев, деп хабарлайды Өңірлік коммуникациялар қызметі.

Бүгін Атырау облысының әкімі Нұрлан Ноғаев активке ауыл шаруашылығы басқармасының жаңа басшысын таныстырды.

Нұрлыбаев Қайрат Есқабылұлы Батыс Қазақстан ауыл шаруашылығы институтын инженер-механик мамандығы бойынша бітірген.

Мемлекеттік қызметте 1999 жылдан бері жұмыс істейді. Еңбек жолын Атырау облысы Қызылқоға ауданы Мұқыр селолық округі әкімі аппаратында маман болып бастаған.

20 жыл Қызылқоға, Құрманғазы аудандары әкімдерінің аппараттарында түрлі лауазымдар атқарды.
2012 жылы Индер ауданы әкімі аппаратының басшысы болып тағайындалды.
Бүгінге дейін Индер ауданы әкімінің орынбасары қызметін атқарды.

— Сіздің біліміңіз, тәжірибеңіз, ұйымдастырушылық, басқарушылық қабілеттеріңіз аймақтың ауыл шаруашылығы саласын жаңа биіктерге көтеретініне сенімдімін. Сіздердің алдарыңызда үлкен міндеттер тұр, атап айтсақ, егіс алаңдарын ұлғайту, шаруа қожалықтарында тамшылатып суаруды белсенді енгізу, облыста егін шаруашылығын дамыту, жергілікті ауыл шаруашылығы өнімдерімен қамтамасыз ету,-деді Нұрлан Ноғаев жаңа тағайындалған басшыға.




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *