АЙ-НҰР ӘЛЕМІ

680

         Көктемнің алғашқы күнінде Қазақстанның Еңбек сіңірген қайраткері, театр және кино актрисасы, дубляж шебері, Қ.Қуанышбаев атындағы Мемлекеттік академиялық қазақ музыкалық драма театрының актрисасы Айнұр Бермұхамбетова «Ай-нұр әлемі» атты концерт-спектаклін көрерменге ұсынды.

         Кеш барысында әнші-актриса жанды дауыспен әртүрлі жанрда ән шырқады, өлең-монологтар оқыды, рөлдерден үзінділер орындады. Қазақ өнеріне өмірін арнаған тарландарға әнмен тағзым етті.

         Айнұр Бермұхамбетова –  көркемсөз шебері, дубляждың майталман маманы, ұстаз, сахна мен экранды қатар алып жүрген алғыр актриса.  Әннің әр сөзін, әрбір нотасын жүректен жүрекке жеткізу әнші-актрисаға тән қасиет. Оның елордалық Қ.Қуанышбаев атындағы Қазақ мемлекеттік академиялық  музыкалық драма  театры сахнасында сомдаған Ғ.Мүсіреповтің «Қыз Жібегіндегі» — Жібек, М.Әуезовтың «Қара қыпшақ Қобыландысында» — Қарлығаш, «Абайында» — Әйгерім,  «Айман – Шолпанда» — Теңге, Қ.Байсейітов пен Қ.Шаңғытбаевтың «Беу қыздар-айындағы» — Айсұлу, В.Дельмардың «Баянсыз бағындағы» — Рода, Ш.Айтматовтың «Ана–Жер Анасындағы» — Әлиман,  «Ғасырдан да ұзақ күніндегі» — Зарипа,  Ә.Нұрпейісовтің «Қан мен теріндегі» — Ақбала, И.Штраустың «Жұбайлар жұмбағындағы» — Розалинда, А.Цагарелидің «Гамарджобасындағы» — Ханума, Ж.М.Шевренің  «Ізгілік формуласында» — Жанн, Ж.Ануйдің «Жалын жұтқан Жанна д’Арктағы» — Жанна сынды бейнелері көрермен  жүрегінен ерекше орын алды.

Өнерлі отбасы –  Нұркен Өтеуілов мен Айнұр өнер әлемінде бір-біріне сүйеу  болып екі ұл тәрбиелеп  отыр. Анасының кешінде кіші  ұлы Ақарыс Әшімхан  гитарамен ән салып, көрермен ықыласына бөленді. Өнердегі әріптестері, өмірдегі достары – Қазақстанның еңбек сіңірген қайраткерлері Қ.Қыстықбаев, С.Камиев, А.Иманбаевамен бірге олар шырқаған «Қыз Жібек» операсынан ария  мен ән-әзілдер де тыңдарман қошеметін туғызды. Олардың барлығы Кәукен Кенжетаев, Есім Сегізбаев, Амангелді Сембин, Мұрат Әбзелбаев сынды ұстаздардың талантты шәкірттері.

         Кеш соңында ҚР Мәдениет және спорт министрі А.Райымқұлованың атынан алғыс хаты оқылды.  Министр А.Бермұхамбетованы туған күнімен қатар келген «Ай-Нұр әлемі» атты кешімен   құттықтап, шығармашылық   табыс пен жетістік тіледі.

         Театр директоры, өнертану ғылымдарының PhD  докторы, Қазақстанның Еңбек сіңірген қайраткері Асхат Маемиров: «Бір өзі бір   театр актерлер болады. Әсіресе, өнерде жалғастық-сабақтастық деген ұғым бар. Сондықтан аға буын актерлардың, Фарида Шәріпова сынды шоқжұлдыздардың ізін жалғастыратын, театр, кино, дубляж, көркемсөз саласын қатар алып жүретін актриса бар ма десе, мен  осы Айнұрды айтар едім» деп, жылы лебізін білдірді.

         Екі күн бойы өткен әсерлі әсем кеш Қаллеки театрының аналар мен қыз-келіншектер мейрамына арналған тамаша тартуы болды. Өз кезегінде Айнұр Болатқызы кештің өтуіне қолдау көрсеткен Нұр-Сұлтан қаласы әкімдігінің Мәдениет басқармасына, театрдың көркемдік жетекшісі Т.Теменовке, театр басшысы  А.Маемировке алғысын жеткізді.

Дана ХАЛЫҚ

 




ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *