Басшылық

ПАТТЕЕВ Шәмшидин Әшенқожаұлы 
«Қазақ газеттері» ЖШС-нің Бас директоры  Редакторлар кеңесінің төрағасы

1960 жылы 12 қаңтарда Оңтүстік Қазақстан облысында дүниеге келген. 1978 жылы Түркістан қаласындағы орта мектепті жақсы тәмамдаған ол еңбек жолын киелі Қожа Ахмет Ясауи кесенесі жанындағы мұражайдың кіші ғылыми қызметкері болып, жөндеу қызметіне қатысудан бастады. 1984 жылы Киров атындағы Қазақ мемлекеттік университетінің журналистика факультетін бітірген.

1988-1991 жылдар аралығында «Өнер» баспасында редактор, 1991-1994 жылдар аралығында «Алдаспан» жастар шығармашылық бірлестіктері қауымдастығының бас директоры болып қызмет атқарған. 1997 жылдан бері халықаралық «Түркістан» газетінің бас редакторы болып қызмет етеді. Осы уақыт аралығында ол қалыпты газет шығаруға ұйытқы болып қана қоймай, басылымның жаңа тұрпаттағы келбетін жасады. Газет бетінде түрлі қоғамдық мәселелерге салиқалы сараптама жасауды тілшілерден үнемі талап етіп отыратын басшы ретінде ол «Түркістан» газетінің республикалық қазақтілді газеттер арасындағы абырой-беделін жоғарылатып, басылым танымдылығын арттыра түсті.

Шәмшидин Әшенқожаұлы мемлекетіміздің қоғамдық өміріне белсене араласып жүр. Оның қоғамдық пікірталастарда, түрлі БАҚ-тар арқылы мемлекеттік тіл, оралмандар тағдырына орай айтып жүрген сүбелі ойлары ұдайы көпшіліктің қолдауына ие.

Қазақстан Республикасының Еңбек сіңірген Мәдениет қайраткері, «Құрмет» орденінің иегері, «Қазақстан Республикасының Тәуелсіздігінің 10 жылдығы», «Астананың 10 жылдығы» медальдарымен марапатталған

 

НОҒАЙБАЕВА Ләззат Әбіжетқызы
«Қазақ газеттері» ЖШС Бас директордың орынбасары

1961 жылы Маңғыстау облысы Маңғыстау ауданында дүниеге келген. 1982 жылы Қазақ Мемлекеттік Университетінің журналистика факультетін тәмамдаған соң Ақтөбе облыстық «Коммунизм жолы» газетінде еңбек жолын бастаған. 1985 жылдан бастап отбасылық жағдайына байланысты Шымкентке қоныс аударып, осындағы доңғалақ жасау заводының көп тиражды газетінде тілші, кейін редактор болып істеді. Шымкент қалалық «Шымкент келбеті» газетінде тілші, жауапты хатшы міндетін атқарған. 1999 жылдан бастап Оңтүстік Қазақстан облыстық әкімшілігі әлеуметтік саясат бөлімінің меңгерушісі, облыстық ақпарат және қоғамдық келісім басқармасының бөлім бастығы , «Қорған» балалар қорының атқарушы директоры болып қызмет істеген. 2005 жылдан бастап Алматы қаласындағы «Таң» телеарнасында бағдарламалар бөлімінің бастығы болды. 2012 жылдың 20 шілдесінен бастап «Қазақ газеттері» ЖШС Бас директордың орынбасары қызметіне бекітілді.
«Тәуелсіздіктің 10 жылдығы» мерекелік медалімен марапатталған. Отбасында екі бала тәрбиелеген ана, немерелері өсіп келеді.