• Айна
• 19 Қыркүйек, 2020

«Болашақ» стипендиясы иегерлерінің тізімі жарияланды

«Болашақ» халықаралық стипендиясы иегерлерінің тізімі жарияланды, деп хабарлайды Kazgazeta.kz Telegram-дағы Білім және ғылым министрлігінің ресми парақшасына сілтеме жасай отырып.

Шетелде кадрлар даярлау жөніндегі республикалық комиссияның шешімімен стипендия 106 үміткерге берілді. Көп ұзамай олар оқуға кіріседі. Стипендиаттардың толық тізімімен мына жерде танысуға болады.

«Болашақ» халықаралық стипендиясын тағайындау үшін конкурстық іріктеудің тазалығы мен ашықтығына қол жеткізуге тағы бір қадам жасалды! Стипендиаттарды іріктеу Президенттік жастар кадр резервіне іріктеу үлгісі бойынша толық автоматтандырылған. Үміткердің конкурстық іріктеу процесіндегі барлық жолы прокторинг және әр кезеңнің бейнетіркеуі сүйемелденіп, цифрландырылды»,-деп жазды Білім және ғылым вице-министрі Мирас Дәуленов.

Ол сондай-ақ кешенді тестілеу мен әңгімелесу процесіне деген көзқарас сапалы түрде өзгергенін айтты. Пәндік білімді тексерудің қажеті жоқ, өйткені барлық үміткерлер оларды ЖОО-ға өз бетінше түсу процесінде көрсетті. 

«Оның орнына біз үміткерлердің талдау, сыни ойлау, фактілерді түсіндіру дағдыларының қалыптасуын және ерекше жағдайларда бейімделу қабілетін бағалауға назар аудардық. Бұл дағдыларсыз шетелдік жоғары оқу орындарында білім алу барлық мағынасын жоғалтады»,-деп толықтырды вице-министр.

«Барлық стипендиаттардың мониторингі Халықаралық бағдарламалар орталығының жаңа порталында цифрлық форматта жүзеге асырылатын болады. Енді стипендиаттарға жарты жылда бір рет транскрипт сканерлеп, есептер жазып, анықтамалар жолдаудың қажеті болмайды. Барлық деректер Blockchain технологиясына негізделген жүйеде жиналады. Жүйедегі кез келген өзгерістер автоматты режимде тіркеледі, бұл стипендиаттың мәртебесі мен оны оқыту кезеңдерінің авторландырылмаған өзгеру мүмкіндігін болдырмайды», - деп хабарлады Дәуленов.