• АҚПАРАТ АҒЫНЫ
• 07 Наурыз, 2021

Ерекше балалардың аналары

Елде 19 мың бала церебральды сал ауруына, 1200-дей бала Даун синдромына шалдыққан. Өкінішке қарай мұндай бүлдіршіндерге оңалту қызметтері әлі күнге дейін тиісті деңгейде көрсетілмейді. Сол себепті белсенді аналар бірлесіп, балаларының қоғамда өз орнын табуы үшін күресіп келеді. 9 ай күткен баласын құшағына алғандағы Нұргүлдің шексіз бақыты ұзаққа созылмады. Дәрігерлер перзентіне сал ауруына шалдыққан деген қорқынышты диагноз қойды. Ал нәресте өскен сайын дерттің қиындықтары жас ананың алдынан кесе көлденеңінен шыға берді. Мәселен, ұлын ешбір спорттық секция қабылдағысы келмеді. Баланы физикалық тұрғыдан дамыту қиынға соқты. Осы кезде Нұргүл Үлжекова қол қусырып отырмай, қарекет ету керектігін түсінеді. Ол әкімдік пен түрлі орталықтарының табалдырығын тоздырып, елордада ерекше балаларға арналған алғашқы спорт секциясын ұйымдастырды. Қазір олар еліміздің 11 қаласында бар. 640 бүлдіршін оған тегін қатысып жүр. 

Нұргүл Үлжекова, «Тең мүмкіндіктер әлемі» ҚҚ директоры:

 – Бұрын менің балам футбол ойнайды деп ойлаған жоқпын деген ата-аналар болатын. Енді қазір бейіндік футбол ойнап жатқан видеоны жібереді. Риза болып, тренерлерді мақтап отырады. Бұрын өзіме сенген жоқпыз. 2016 жылы бір ғана бейіндік орын ашқан болатынбыз. Каратэ. Соған да тәубә деп отырғанбыз. Енді қазіргі таңда соншама спорт үйірмелерін ашып, соншама балаларға көмек көрсеткеніме өте ризамын. 

Соңғы жылдары Даун синдромымен туылып жатқан нәресте саны артып жатыр. Евгения Чеботаревская да – мұндай сынақпен бетпе-бетпен келген ана. 6 жыл бұрын оның ұлына дәл осы диагноз қойылды. Алайда елде мұндай ерекше балаларға арналған оңалту орталықтары жоқ. Оларды қоғамдағы өмірге бейімдеу үшін кәсіби психолог, логопед, дефектологтардың көмегі қажет. Қиындықтарға ешқашан мойымайтын Евгения басқа аналармен бірлесіп, қоғамдық қор ұйымдастыруды жөн көрді. Мекеме 2016 жылы іске қосылды. Қазір орталықтың 120-130 баланы оңалту процедураларымен қамтамасыз етуге қауқары бар. Алайда пандемия салдарынан қоғамдық қор көптеген қиындыққа кезікті. Жергілікті атқарушы органдармен келісімдер уақытылы жасалмай, орталық қаражатсыз қалды. Ал қалталы азаматтар арасында ерекше балаларға көмектесемін дегендер жоққа тең болып шықты. 

Евгения Чеботаревская, «Күн балалары» қоғамдық қорының жетекшісі: 

– Шет мемлекеттерде балалар қоғамда өз орнын тауып, бәрімен тең деңгейде өмір сүре алады. Біздің де мақсатымыз сол. Қазақстанда Даун синдромына шалдыққан балаларға бейімделу оңайға соқпайды. Қазір біздің базада 500 бала бар. Біз жылына ең көп дегені 130 бүлдіршінді қабылдай аламыз. Жетістіктеріміз жоқ емес. Орталығымызға келгендердің көбінде оң өзгерістер бар. Жақында түлегіміз жұмысқа орналасты. Соған өте қуаныштымыз.

Қаржы қиындығынан шығу үшін Евгения сабақтарды ақылы түрде де ұйымдастыруға мәжбүр болды. Бірақ мұндай қадамдар бұл мәселені толық шеше алмайды. Ел үкіметінің көмегінсіз ерекше балаларға қоғамда бейімделу ауырға соғады. Дегенмен қайсар аналар діттегеніне жетпей қоймайтындарын айтады. Сол себепті олар әрі қарай да мұқтаж жандарға жәрдем беруді жалғастырады.

24.kz