- Айна
- 09 Қаңтар, 2018
Балаңызға қаншалықты көңіл бөлесіз?
Соңғы 15 жылда балалар арасындағы психикалық ауытқулар саны күрт өскен.
Қазіргі кезде тіршілік қамымен және жұмысбастылықпен жүрген ата-аналардан балаларына көңіл бөліп, сөйлесетін уақыттың жоқтығын жиі естиміз. Баланың тән денсаулығына ғана емес, жандүниесінің жағдайына да үңіліп, көңіл бөлу қажеттілігін ата-аналардың көбі ұмытып кеткен. Ал отбасындағы ата-ана тәрбиесінің жеткіліксіздігі бала келешегіне балта шабатынын ескереміз бе?
Ата-аналардың басым бөлігі бірінші кезекте балаларының материалдық жағдайын ойлап, керекті киім-кешекпен, ойыншықтармен, түрлі демалыс лагерлеріне жолдамалармен қамтамасыз етеді. Ал оның психологиялық жағдайына, мінез-құлқына, көңіл-күйіне назар аударуды жөн санамайды. Сол себепті бала мектепте болып жатқан жаңалықтарды, өзімен жасты құрбыларымен арадағы қарым-қатынасын, ішкі уайымдарын бөлісе алмай, іштей тынып, мұның соңы күйзелістерге алып келеді. Баласымен жақын араласып, сырласа алатын әке мен шеше қазіргі қоғамда сирек кездеседі.
Психологтардың айтуынша, соңғы жылдары 10-14 жас аралығындағы жасөспірімдер арасында күйзеліс пен өзіне қол салу көрсеткіштері бірнеше есеге артқан. Бұған ғаламтор немесе ортаның жағымсыз әсері кәнәлі емес. Ата-анасына сырын ақтарып, кез-келген мәселеде еркін бөлісе алатын балада ешқашан өзіне қол салу немесе өзгеге зиянын тигізу туралы ойлар болмайды.
Бұрын біздің бос уақытымыз мүлдем болмайтын. Үй шаруасын ата-анамызбен бірге атқаратынбыз. Өйткені ол кезде тәртіп сондай еді. Түрлі үйірмелер тегін болатын, ата-аналардың да уақыты қазіргідей тығыз емес, балаға көп көңіл бөлінетін, ғаламтор жоқ, яғни ата-ананың да бала-шағаның да бір-бірімен араласатын мүмкіндігі еш шектелмейтін. Бала іш пысу дегеннің не екендігін білмей өсетін. Қазір барлығы да басқаша. Қарбалас тіршілік, уақыттың тығыздығы ата-ана мен бала арасын алшақтатып жіберді. Балғын балалық шақ балаңыз үшін бақытты болсын десеңіздер, мына кеңестерге назар аударыңыздар:
- Баламен теңдей араласыңыз. Араларыңызда сенімді қарым-қатынас орнатыңыз. Балаңыз сізге әңгіме айта бастағанда телефонға немесе басқа шаруаларға алаңдамай, оны соңына дейін тыңдаңыз. Қонаққа барғанда өзіңізбен бірге ертіп жүруге тырысыңыз.
- Балаңызды ол қалаған нәрселермен емес, оған қажет нәрселермен қатмтамасыз етуге тырысыңыз. Егер де балаңыз белгілі-бір нәрсеге мұқтаж болмаса, оның өтінішінен бас тартудан қорықпаңыз. Тек мұндай шешіміңізді дөрекі түрде айтпай, жаймен түсіндіріңіз.
- Дастархан басындағы кешкі астарыңыз гаджеттерсіз өтетін болсын. Аптадағы бір күніңіз отбасына арналатын болсын.
- Күн сайын баланы үй шаруасына бейімдеңіз. Ол өз міндеттерін атқара білуі керек.
- Ас ішкенде, дүкенде, көлікте, қонақта гаджет қолдануын шектеңіз.
- Түрлі техникалар мен ғаламтор қолдануына кетіретін уақытын азайтыңыз, бірақ мүлдем шек қоймаңыз. Өйткені ол балалық шақтың әуестіктерін білуі керек. Бұл оның өзімен жасты құрбыларымен тіл табысып, қарым-қатынас орнатуына оң ықпал етеді.
- Балаға ата-аналық махаббаттарыңызды білдіріп, оның тұлға екендігін көрсетіңіз. Жеке өміріне, достарының қызығушылықтарына ықыласпен қараңыз. Бірақ өзіне тиесілі жұмысты ол үшін атқармаңыз. Бала өскен кезде сіздің көмегіңізге үнемі мұқтаж болмауы керек.
- Балаңызды әр түрлі үйірмелерге бейімдеңіз. Бірақ тым шектен шығып, қатты шаршартпаңыз. Өзі қалайтын және қызығатын нәрселермен араласқаны дұрыс. Баланың сізбен араласуына да уақыт қалдырыңыз.
6125 рет
көрсетілді0
пікір