The New York Times-тың ең үздік жазбалары қазақ тіліне аударылады

АҚШ-тың The New York Times газетіндегі авторлардың ең үздік жазбалары қазақ тіліне аударылып, Baq.kz порталында жарияланатын болады.

"ҚазКонтент" АҚ-ның Басқарма төрағасы Евгений Кочетов осы жылы Пол Крупман сияқты аты әлемге әйгілі авторлардың еңбектері қазақ тіліне аударылып, компанияның Baq.kz порталында жарияланатынын атап өтті.

"Биыл Baq.kz порталында бірқатар қызықты жоба таныстырылады. Бірінші жоба – бұл The New York Times-тың атақты авторларының жазбалары қазақ тіліне аударылуы. Олардың қатарында экономика саласы бойынша нобель сыйлығының иегері Пол Крупман сияқты әлемге әйгілі авторлар бар. Мұндай авторлардың еңбектері Baq.kz ақпараттық агенттігінде эксклюзивті нұсқада жарияланады", - деді Евгений Кочетов.

Сондай-ақ, Басқарма төрағасының айтуынша, Baq.kz ақпараттық агенттігі аймақтық бұқаралық ақпарат құралдарымен жұмысын жаңартып, күшейте түседі және Baq.kz негізінде "Аймақтық БАҚ" жобасы қайта басталады.