АҚПАРАТ АҒЫНЫ
10 Сәуір, 2018

Дубайдағы «ЭКСПО-2020» көрмесінің ең үлкен павильоны Қазақстанға тиесілі

Біріккен Араб Әмірліктері Дубайдағы ЭКСПО-2020 көрмесіне қатысу үшін қазақстандық павильонның құрылысына ең үлкен жер телімінің бірін ұсынды. Бұл туралы ҚР-ның БАӘ-дегі төтенше және өкілетті елшісі Қайрат Лама Шариф мәлімдеді, деп хабарлайды Baq.kz ақпарат агенттігіне сілтеме жасап Kazgazeta.kz.

«Қазақстанның БАӘ-дегі елшілігі мен «Астана ЭКСПО-2017» Ұлттық компаниясының келіссөздер тобының жемісті жұмыстардың нәтижесі ретінде Президент Н.Ә.Назарбаевтың сапары барысында Қазақстанның ЭКСПО-2020 дүниежүзілік көрмесіне қатысуы туралы келісімшартқа қол қойылды. Соның арқасында Әмірліктер тарабы қазақстандық павильонды құру үшін БАӘ, Монако, Швейцария және Люксембург павильондарының жанында орналасқан жалпы көлемі 3420 шаршы метр құрайтын ең ауқымды жер телімін берді», - деді ҚР-ның БАӘ-дегі төтенше және өкілетті елшісі Қайрат Лама Шариф.

Дипломаттың пайымынша, аталған көрме сәтті өткізілді деп болжауға болады. Себебі көрменің басталуына екі жыл бұрын 150 мемлекет ресми қатысуын растаған, сондай-ақ 38 мемлекет қатысу туралы келісімшартқа қол қойған.

«Қазақстан аталған шараға қатысу мәселесіне зор мән береді және оның Астанада өткен ЭКСПО-2017 көрмесінің негізгі тәсілдемесін сәтті біріктіретін «Болашақ үшін сана-сезімді біріктіру» атты тақырыбын қолдайды. БАӘ қазақстандық саяхатшылар үшін демалатын танымал ел болып саналады. Әрине, 2018 жылғы 10 наурыздан бастап қазақстандықтардың Әмірліктерге визасыз кіру тәртібі алдағы уақытта туризм айналымы мен іскерлік байланыстардың кеңеюіне жол ашады және ЭКСПО-2020 көрмесіне қатысуға серпін береді», - деді Қайрат Лама Шариф.

Естеріңізге сала кетейік, дүниежүзілік ЭКСПО көрмесі Дубайда 2020 жылдың 20 қазаны мен 10 сәуір аралығында өтеді. Ұйымдастырушылар шамамен 25 млн келушілер болады деген үмітте. Экспо кешенінің жалпы ауданы 438 га, оның ішінде 150 га жер көрме аумағы болса, қалған бөлігінде жерүсті метро, «Dubai South Mall» сауда орталығы, тұрғын үй, логистикалық және қонақүй нысандары орналасады.

677 рет

көрсетілді

пікір