• Айна
• 13 Қараша, 2018

Арыс қаласындағы С.Қожанов атындағы орта мектепте ІТ сыныбы ашылды

 «Цифрлы Қазақстан» мемлекеттік бағдарламасы аясында білім беру ұйымдарын цифрландыру және ҚР Президенті Н.Ә.Назарбаевтың биылғы жолдауында айтылған цифрлы технологияны қолдану арқылы құрылатын жаңа индустрияларды өркендетуге бағытталған жобаларды іске асыру мақсатында Арыс қаласының білім бөліміне қарасты С.Қожанов атындағы жалпы орта білім беретін мектебінде алғашқы ІТ сыныбы ашылды. Бұл туралы  қала әкімінің баспасөз қызметі хабарлайды.

ІТ сыныбының ашылу салтанатына Арыс қаласы әкімінің орынбасары Р.Айтбаев, «Нұр Отан» партиясы Арыс қалалық филиалының консультанты Ғ.Қошаманов және білім бөлімінің басшысы Ә.Мұсаев қатысты.

С.Қожанов атындағы жалпы орта білім беретін мектебінің заманауи ІТ сыныбында 8-16 жас аралығындағы барлық мектеп оқушылары робототехника саласын және бағдарлау негіздеріне үйренетін болады.

ІТ сыныбын жабдықтауға жергілікті бюджеттен 5 млн теңге қаржы жұмсалды. Бұл сыныпта оқушылар ақпараттық технология саласын меңгереді. Web сайттар ашып, робот құрастыру және оны басқару, 3D принтинг және тағы басқа жеке жобалар жасауға үйренеді. Үздіктері республикалық, халықаралық ІТ байқауларға қатысып, тың идеяларын дамытуға мүмкіндік алады.

«Нұр Отан» партиясының мемлекеттік және жергілікті органдармен бірлесуі арқасында алдағы үш жылда бағдарламалау мен робототехника негіздерін тереңірек тегін оқытатын ІТ-сыныптар ашылатын болады.