ТҮРКІСТАН ОБЛЫСЫНЫҢ ӘКІМІ КӨШБАСШЫ ЖАСТАРМЕН КЕЗДЕСТІ

Түркістан облысының әкімі Жансейіт Түймебаев еліміздің көшбасшы жастарымен бейресми кездесу өткізді. Басқосуда Түркістан өңіріндегі жастардың жеткен жетістіктері мен шешуді қажет ететін түйіткілдер әңгіме арқауына айналды, деп хабарлайды облыс әкімінің баспасөз қызметі.

Жиын барысында аймақ басшысы жалынды жастарды түркі әлемінің рухани астанасы атанған өңірдің өркендеуіне үлес қосуға шақырды.

 «Елбасы Нұрсұлтан Назарбаев халыққа арнаған Жолдауында 2019 жылды «Жастар жылы» деп жариялады. Мұны облыс халқының жастары ерекше ықыласпен қабылдады. Қазіргі таңда Жастар жылын өткізу жөніндегі ел Үкіметі жол картасын әзірлеуде. Аталмыш жобаға Түркістан қаласында өтетін ірі көлемді халықаралық іс-шаралар енгізілуде. Мәселен, келер жылы Орта Азия елдері жастарының Форумы, түркі тілдес мемлекеттердің жастарының конгресі ұйымдастырылмақ. Сондай-ақ, облыстағы әр ауданның белсенді жастары ай сайын «Түркістанға тарту» атты шығармашылық шаралар өткізбек. Баршаңызды осы сынды игілікті істің қасында болып, Түркістанымызды дамытуға шақырамын», – деді облыс басшысы.

Жастар жағы Түркістан өңірінде өскелең ұрпақтың жан-жақты дамуына жағдай жасалып жатқаны көңіл қуантатынын жеткізді.  «Қазақстанның 100 жаңа есімі» жобасының жеңімпазы, Дүниежүзілік Тоғыз құмалақ Федерациясы спортшыларының жетекшісі, Тоғыз құмалақтан әлемнің 7 дүркін чемпионы Әсел Далиева, өзі жеткен жетістіктерін өңіріміздегі жастарға көрсетілген қолдаумен байланыстырады.

«Қазіргі таңда өңіріміздің жастары түрлі салалардағы байқаулар мен сайыстарда биік белестерді бағындырып жүр. Бұл ретте, жастарға жасалып жатқан қолдаудың маңызы орасан зор. Бүгінде жаттықтырушының да қызметін қоса атқарудамын. Мұның барлығы Сіздің біздерге деген сеніміңіз, жас спортшылардың бойына артылған үлкен үміт. Облыс орталығының Түркістан қаласына ауысуы тоғыз құмалақ спорт түрінің одан ары жандануына мүмкіндік беретінін айтқым келеді. Яғни, жаңа ғимараттар мен спорт алаңшаларының салынуы жас спортшылардың жаңа қырынан көрінуіне есік ашатыны сөзсіз. Осы мүмкіндіктерді пайдаланып облысымыздың тек алдыңғы қатардан көрінуіне үлес қосатынымызға сенім білдіргім келеді», – деді Әсел Егізбайқызы.

Үш күнге жалғасатын форум «Терең тарихтан – жарқын болашаққа!» атты республикалық пікір-сайыс турнирімен басталды. Салтанатты жиынға облыс әкімі Ж.Түймебаев арнайы қатысып, қатысушыларға сәттілік тіледі. Дебат ойынында қатысушылар елдегі жастар саясаты мен түркі әлемінің рухани астанасы атанған Түркістан қаласын дамытуға байланысты келелі мәселелерін ортаға салды. Сайысқа республиканың барлық аймақтарынан 2 адамнан құрылған 75 команда қатысты.

Сондай-ақ, форум қатысушылары Түркістан қаласындағы «Қожа Ахмет Ясауи» кесенесі, Сауран қалашығы және Отырар ауданындағы «Арыстан баб» кесенесі, «Руханият Әбу-Насыр Әл-Фараби» мұражайы, «Көне Отырар төбе» қалашығын аралап, тарихымен танысты. Форум аясында жастарға арналған «IntellectGAME» зияткерлік ойындары және халықаралық «Жайдарман» сайысы ұйымдастырылады. Оған Қырғызстан, Өзбекстан, Башқұртстан, Татарстан, Түркіменстан, Түркия Республикаларының құрама командалары және еліміздің әзілкештері қатысады деп күтілуде.