- АҚПАРАТ АҒЫНЫ
- 22 Қаңтар, 2019
СІМ: "Жусан" операциясы жалғасады"
ҚР СІМ ресми өкілі Айбек Смадияров Қазақстан азаматтарын Сириядан эвакуациялауға байланысты гуманитарлық операция жалғасатынын мәлімдеді, деп хабарлады ҚазАқпарат агенттігі.
«Өздеріңізге мәлім, осы жылдың ең басты жаңалығы - Мемлекет басшысының тапсырмасымен іске асырылған «Жусан» операциясы болды. Ол операцияның мән-жайы Сыртқы істер министрлігінің арнайы брифингінде айтылды. Операция шеңберінде 47 азамат Қазақстанға жеткізілді. Оның отызы 1-5 жас аралығындағы сәбилер», - деді Айбек Смадияров.
Оның айтуынша, елге әкелінген сәбилердің көпшілігі Сирия аумағында дүниеге келген. Сондықтан, бұл операцияның басы ғана, ол жалғасып жатыр. «Бұл операция әлі жалғасады. Бірақ, мән-жайын толық айта алмаймыз. Өйткені, бұл операцияда бізге халықаралық ұйымдар мен серіктестер көмектесіп жатыр. Сол себепті, көп ақпарат әлі жұмыс бабында. Түсінушілік танытуды сұраймыз», - деді ол.
Осыған дейін Қазақстан Президенті Нұрсұлтан Назарбаев Қазақстан азаматтарын Сириядан эвакуациялауға байланысты мәлімдеме жасаған болатын. 6 қаңтар күні құқық қорғау органдары мен Сыртқы істер министрлігі жүргізген гуманитарлық шара нәтижесінде Сириядан 47 азаматымыз, соның ішінде 30 бала елімізге қайтарылды.
1069 рет
көрсетілді0
пікір