Тікелей эфир
Тікелей эфир
МАҢЫЗДЫ
  • АҚПАРАТ АҒЫНЫ
  • 10 Сәуір, 2020

Жұма күнгі тілек

Тірі жанды жамандыққа қимаған, Жомарт Аллам, тағы жұма сыйлаған. Тәубеге кеп, сізден кешірім сұраймын, Күллі әлемді жаратушы, Ар-Рахман! Әл-Хәким - төреші сіз бұл жалғанда, Демейтін де өзіңіз құлағанда. Әл-Уаһһаб – қорғансыз сіз бар адамға, Құр қайтармай, сый берген сұрағанда. Сағындым, Әл-Уасиғ қамсыз күнді, Өзіңізге аян ғой хал бүгінгі. Ар-Рошид, тура жолға бастаңызшы, Қол жайып, дұға еткен бар құлыңды. Пендеңізге, Ар-Роууф, қамқор - сізсіз, Әрекет ете алмаймыз біздер сізсіз. Әміріңіз болмаса, Әл-Муhәймин, "Жапырақ та түспейді жерге" сөзсіз. Мұқтажбыз біз, Ас-Сомад, өзіңізге, Тартуыңыз болсыншы төзім бізге. Әл-Мәлик, кешіріңіз, кешіріңіз, Шүкіршілік аз болса тіпті бізде. Қасиетті, Әл-Қуддус, сізсіз-сыншы. Сырқатқа сан тосқауыл қойылсыншы. Жалғанның қонақтары жапа шекпей, Әл-Қобид, кесел-індет жойылсыншы. Әр – Рахим, сіз деп соғар демім ішкі, Жүрекке күш пен қуат егіңізші. Шипаға зәрулерді емдеп, жазып, Ал-Мужиб, денге саулық беріңізші. Ат-Тауәб, кешіріңіз, ағат бассам, Шыдамай сан сынақта тулап, қашсам. Әш-Шәкур, мың шүкірлік, қолда барға, Ғафу еткін, кездерді асып -тасқан. Аманат бізге берген таң да әрбір, Әл-Мухи, өмір сүру - бақыт, ол бір. Әл-Қадир, қиянатқа жол бермейтін, Өтінем, бұйырсыншы мұңсыз тағдыр. Әрқашан да, Әл-Бағис, қолдаңызшы, Ем қажет жанға шипа жолдаңызшы. Жәрдем сұрап, сенделген бар әлемді, Әл-Хафиз, жамандықтан қорғаңызшы. Әл-Муғизз, қиналғанды демеңізші, Айықтырып кеселден емдеңізші. Әл-Бәрр, сан сынаққа төзердейін, Құдіретіңмен панаға ап жебеңізші. Әл-Бақи - бұл фәнидің әміршісі, Адамзат көрмесінші ешбір тепкі. Ән-Нафиғ, ем шарасы дәрігердің, Сауықтырып, жазсыншы әрбір дертті. Әл-Мәниғ, қайғыны алып тастасаңыз, Әл-Фәттах, қайырлы іске бастасаңыз. Бейбіт күннің ер жүрек батырлары, Ақ халатты жандарды сақтасаңыз. Иманның нұрын, Ән-Нур, себіңізші, Жұртымның жоғалмасын сенімі ішкі. Сын сәттерде, Ас-Собур, бір өзіңіз, Таусылмайтын мол төзім беріңізші. Әл-Ғаффар, арпалыста сезім ішкі, Күмәннің қара бұлтын сөгіңізші. Әл-Ғафур, астамшылық жасасақ көп, Мүмкіндік түзелуге беріңізші. Әл-Уакил, жетім, жесір жыламасын, Әл-Мумин, үміт туы құламасын. Зағип пен кемтар жандар сын сағатта, Дерті үдеп, азап шегіп қиналмасын. Әл-Ғоний, мұқтаждарды қолдағайсыз, Індеттің шырмауынан қорғағайсыз. Әл-Қоуий, жас-кәріге қуат беріп, Ажал құшып кетуден сақтағайсыз. Әл-Адл, әділдікке бастағайсыз, Елімді басшысымен сақтағайсыз. Әл-Хәкәм, араздарға татулық пен Тас жүрекке жылулық сыйлағайсыз. Әл-Мухий, қайырлы еткін әрбір істі, Жандансын кәсіпорын, жұмыс күші. Әл-Мубди, кертартпалық көрсетпей еш, Болайық жақсылықтың ұйытқысы. Әл-Уадуд, ана, бала мұңаймасын, Қолда бар бағын әсте, аяласын. Әл-Уарис, жүкті аналар бала сүйіп, Сәбиге шарапатын аямасын. Әл-Муқсит, ез бен есер болмасыншы, Ұлты мен тілін, дінін қорғасыншы. Әл-Хобир, бәрі сізге аян, әсте, Өрт, сел, су апаттары болмасыншы. Әл-Кәрим, құт-береке ұзамасын, Әл-Али, елдің рухы құламасын. Әл-Муқит, жоқшылықта азып-тозып, Еш қазақтың баласы жыламасын. Әл-Алим, оқушы, ұстаз қауышсыншы, Мектебінде бәрі аман табыссыншы. Әл-А`зим, ұстаз біткен мәз-мейрам боп, Ал шәкірт білім қуып, жарыссыншы. Әш-Шахид, бәз баяғы заман болсын, Індеттің ізі қалмай, тәмам болсын, Әл-Мәжид, ақыл айтып, бағыт берер, Қазыналы қарттарым аман болсын. Әл-Мәтин, тұмар етіп қанағатты, Ойлайық дәл бүгіннен болашақты. Әл-Һәди, ғидаят пен таупих беріп, Тәукелшіл еткейсіз жас ұрпақты. Әл-Халим, ана, бала жыламасын, Сенімнің асқар тауы құламасын. Әс-Сәләм, сақтағайсыз елімді аман, Соғыс, індет ұйқысын ұрламасын. Ар-Роззақ, зекет берер жан көбейсін, Дегізбейтін жалғызды жат, өгейсің. Мәликул-мулк, кең-байтақ Жер-Ананы, Тыныштық бесігінде тербеткейсің. Әл-Хамид, көркем мінез иесі еткін, Тілегін қабыл етіп дүйім, көптің. Әл-Жәлил, тура жолдан адастырмай, Жүрекке иман құйып, мейірім төккін. Әл-Қоююм, адам етіп жарату да, Құдіретіңізбен кеш батып, таң ату да. Әл-Басит, бақытты да, өмірді де, Беретін де өзіңіз, алатын да. Әл-Хасиб, болсадағы іс көп сонша, Қайтамыз өзіңізге үкім болса. Әл-Муғид, лайықты күн кешейік, Ғұмыр бере тұрыңыз, мүмкін болса. Әл-Мухси, әрбір күннен сабақ алып, Минуттың да қадірін ұқтық анық. Әл-Муаххир, қиындық артта қалып, Жақсы хабар естісін күллі халық. Әл-Муқтадир, жасайық амал ізгі. Жан еткейсіз иманды, айтары ізгі Зул-жәләли уал-икрам, бұл фәниде, Сүйген құлың еткейсіз баршамызды! Авторы: Сафура Сәлімбайқызы

1127 рет

көрсетілді

0

пікір
Алдыңғы мақала Қасым-Жомарт Тоқаевтың Төтенше жағдай режимін қамтамасыз ету жөніндегі мемлекеттік комиссияның отырысында сөйлеген сөзі
Келесі мақала Тоқаев Түркі тілдес мемлекеттері ынтымақтастық  кеңесінің төтенше саммитіне қатысты

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *