• УЙҒУР АВАЗИ
• 26 Қыркүйек, 2011

Жүрәк нидаси мисраларға қачиланған

Әдәбиятни сөйүш, уни яхши көрүп өтүш бир башқа, әнди әдәбият қайниминиң ичидә болуш вә өзиму дайим иҗат мәйданида йеңи әсәрлири билән көрүнүш, бу — тамамән башқа мәсилә. Буни қолиға қәләм алған, иҗат-әмгәкниң «аччиқ-чүчигини» тетиған кишиләр яхши билиду. Уйғур наһийәсиниң Чонҗа йезисида истиқамәт қиливатқан шаир һәм журналист Мирзәхмәт Меримов әйнә шундақ қәләм саһиплиридин. Тирикчилик қайнап турған йезида яшап, әллик жилға йеқин иҗат қилиш, ейтмаққила оңай болса керәк. Лекин мәшәқити нурғун иҗадийәткә Мирзәхмәт акидәк қийинчилиқларни йеңишкә қабил, ирадиси мәккәм адәмләрла садиқ болуп қалса керәк. 

Буниңға униң йеқинда «Мир» нәшриятидин өйидин 20,5 басма тавақ көләмидә бесилип чиққан «Һаят ишқи билән интилип» намлиқ шеирлар топлими гува. Төрт бөлүмдин ибарәт бу топламға шаирниң өткән әсирниң 60-жиллиридин башлап бүгүнки күнгә қәдәр язған шеирлири, балладилири җәмләнгән. Улар асасән инсан һаятиниң көләңгү тәрәплири, алий пәзиләтләр, хиянәткарлиқ, мәнсәпхорлуқ, достлуқ, қериндашлиқ, туғулған жут, Вәтән вә сөйгү-муһәббәт мавзулирини өз ичигә алған. Шаир көплигән шеирлирида хәлқимизниң тәғдири тоғрилиқ ой қозғап, жүрәк нидасини мисраларға қачилайду.

Қисқиси, һаят ишқида янған шаирниң мәзкүр топлимиға киргүзүлгән шеирлирида иссиқ-соғи қатар жүридиған өмүр һәққанийити вә шаирниң уни сөйүп яшайдиғанлиғи күйләнгән.

Шәмшидин АЮПОВ.