Тікелей эфир
Тікелей эфир
МАҢЫЗДЫ
  • Безбен
  • 02 Желтоқсан, 2021

«KASPI» аударым: кімдер салық төлейді?

Қазіргі уақытта әлеуметтік желілерде жолаушылар тасымалымен айналысатын жеке тұлғаларды, яғни такси жүргізушілерін мобильді аударымдардан бас тартып, қолма-қол ақшаға көшуге шақыратын ақпараттар таралуда, - деп хабарлайды Жмбыл облыстық Өңірлік коммуникациялар қызметі.

Осыған қатысты ӨКҚ баспасөз алаңында Жамбыл облысы бойынша мемлекеттік кірістер департаменті «Байланыс орталығы» басқармасының басшысы Өмірзақ Қоспанов баяндама жасады. Оның айтуынша, салық заңнамасына мобильді аударымдарды пайдалануға байланысты енгізілген өзгертулер жеке тұлғалардың жеке аударымдарын кәсіпкерлік мақсатта жүзеге асырылатын мобильді төлемдерден бөлуге арналған. Олар бизнес қауымдастықпен және банктермен бірнеше рет талқыланған.

«Бұл бастамалардың мақсаты цифрлық кеңістікте бизнесті дамытуды көздейді, қолма-қол ақшаға көшуге мүлдем ықпал етпейтінін ескеру керек. Мұнымен қоса, «барлық мәліметтер мемлекеттік кірістер органдарына беріледі» деген ақпарат та негізсіз. Ешқандай да алаңдаудың қажеті жоқ. Келесі жылдан бастап банктерден тек кәсіпкерлік шоттарына түскен төлемдер туралы ақпарат алу жоспарлануда. Сондықтан, жеке аударымдарға салық салынбайды», - деп түсіндірді Өмірзақ Сайлауұлы.

Ал жеке кәсіпкер салық салу бойынша өзіне ыңғайлы режимді таңдай алады. Мысалы, такси жүргізушілері патент негізінде арнайы салық режимін қолдана алады. Бұл табысы жылына 10 миллион 300 мың теңгеден аспайтын жағдайда ғана қолданылады.

Кассалық аппараттарға қатысты айтқан спикер қазір бірнеше мобильді қосымшалар бар екенін еске салды. Кәсіпкер онлайн кассаның мобильді нұсқасын жүктеп алып, заңды түрде пайдалана алады. Ал салық есептілігі e-Salyq Business қосымшасын енгізу арқылы автоматты түрде жасалады. Бұл шаралардың барлығы бизнесті жүргізуді одан әрі жеңілдетуге бағытталған.

Еске салайық, қабылданған мораторий аясында жеке кәсіпкерлер 2023 жылға дейін табыс салығын төлеуден босатылған.

498 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз