- АҚПАРАТ АҒЫНЫ
- 23 Қаңтар, 2022
Үнемдеу тенденциясы қалай қалыптасып келеді?
Бүгінгі таңның әлеуметтік-тұрмыстық тұрғыдағы басты қағидасы үнем және үнемдеу болып тұрған сияқты. Себебі, екі жылдан бергі пандемия өз алдына, осыған сәйкес туындаған нарықтағы баға да соған мәжбүрлеп отырғаны даусыз.
NielsenIQ компаниясының зерттеуіне қарағанда, былтыр қазақстандықтардың 75%-ы тұрмыстық шығындарды үнемдеген. Мәселен, елдің 67%-ы жаңа киім сатып алуды, 61%-ы ойын-сауықты азайтса, 53%-ы үйден тысқары жерлерде тамақтанбаған.
Өткен жылдың екінші жартыжылдығында мейрамханалар мен ойын-сауық орындарындары қалыпты тіршілікке қайта оралып жұмыстарын жалғастыра бастады. Бірақ бәрібір бұрынғы тасқын жоқ. Бұл – Қазақстан халқының көңіл көтеруден гөрі, үнемге бейімделе бастағанының белгісі. Оның себебі де бар. Әуелі азық-түлік күн санап қымбаттап жатыр. Мәселен, 2021 жылдың соңында жасалған сауалнамаға қарасақ, ел астанасы тұрғындарының 97%-ы осындай мәлімет беріпті. 2020 жылы бұл көрсеткіш 91% болған.
Тура осындай жағдай Алматыда да байқалып отыр. Соған сәйкес Алматы мен Нұр-Сұлтан қаласының әрбір екінші тұтынушысының үнемге бет бұрғаны, әрбір үшінші тұрғынының акциямен сатылатын тауарлар іздейтіні дәлелденді.
Елдегі баға нарқына келсек, тұрғындар алдымен нан, сүт өнімінің қымбаттағанына қынжылыс білдіреді. Алкогольді ішімдік бағасының қымбаттауына да наразылық білдірушілер аз болмады. Соған қарамастан, былтырғы деректерге қарағанда, анағұрлым арзан тауар іздеушілер саны Алматыда 18%-ға, Нұрсұлтан қаласында 13%-ға азайыпты. Демек, тұрғындар арасында күн сайын қымбаттап жатқан баға нарқына көндігу тенденциясы да байқалады деген сөз.
NielsenIQ компаниясы жүргізген сауалнамасында демалысқа жұмсайтын қаржысын үнемдеушілердің біршама азайғаны байқалады. Басы артық ақшасын инвестиция салуға жұмсайтындар саны 2020 жылғы 13%-дан 2021 жылы 18%-ға артыпты. Есесіне еркін қаржысын медициналық тексеруден өту қызметіне және тұрғын-жайды жөндеу жұмыстарына жұмсайтындар саны күрт азайған.
Бұл нені көрсетеді? «Ұра берсе, шайтан да өледі» демекші, пандемиясы бар, басқа да себептері бар, нарықта туындап отырған қымбатшылыққа қарапайым халықтың біртіндеп көндіге бастағаны байқалады.
АЛ ЕЛІМІЗДЕ АЗЫҚ-ТҮЛІК НАРҚЫНДАҒЫ ҚАЗІРГІ ЖАҒДАЙ ҚАНДАЙ?
Былтыр жыл соңында елдегі әлеуметтік маңызы бар азық-түлік бағаларының 0,1%-ға төмендегені ресми түрде айтылды. Атап айтқанда, арзандау тенденциясы Түркістан облысында 0,6%, Астанада 0,3%, Шымкентте және Маңғыстау облысында 0,2%, Алматы қаласы мен Қарағанды облысында 0,1% көлемінде делінген.
Бәсекелестікті қорғау және дамыту жөніндегі агенттік нарық субъектілеріне 113 ескерту жасап, 16 тексеріс жүргізген.Бұл турасында жыл соңында премьер-министр төрағалығымен өткен әлеуметтік маңызы бар тауарлар бағасын реттеу жөніндегі жиында айтылды.
Бұл орайда Әлихан Смайылов бастаған жаңа үкімет білек сыбана жұмыс істеуге кірісті.
Сауда барысындағы қосымша бағаны 15%-дан 10%-ға дейін төмендету туралы өндірушілермен, көтерме саудагерлермен және сауда тораптарымен былтыр 192 келісім жасалған. Бұл тарапта 75 бұрмалау анықталып, жағдай реттеліпті. Жыл соңында орталық мемлекеттік және жергілікті атқарушы органдарға қолда бар тетіктерді пайдалана отырып әлеуметтік маңызы бар өнімдер бағасын тұрақтандыру және төмендету жұмысын одан әрі жалғастыру тапсырылды.
Былтырғы желтоқсан айында осындай іс-шаралар барысында азық-түліктің жылдық бағасының 0,4%-ға, ал жалпы инфляцияның 0,2%-ға төмендегені ресми айтылған болатын.
Үнемдеу – еріккеннің шаруасы емес. Қымбатшылықтан қажудың белгісі. Әйткенмен былтыр әлеуметтік маңызы бар тауарлар құны елімізде аса қымбаттамаған. Он бес аймақта әлеуметтік маңызы бар тауар бағасының көтерілуі тіркелмеген. Тіпті Нұр-Сұлтан қаласында 0,2, Павлодар мен Маңғыстау облыстарында 0,1 пайыз арзандау байқалған.
Оған қоса кейбір азық-түлік түрлері бағасының төмендеп келе жатқаны белгілі болды. Нақтырақ айтқанда, қарақұмық 0,6%, қант, сәбіз, тауық еті мен күріш 0,1% арзандаған. Басқа өнімдер нарқы тұрақты, яғни қымбаттау жоқ деген сөз.
Осының бәрі үкімет атқарып жатқан жұмыстардың нәтижесін көрсетеді. Былтыр жыл соңында бәсекелестікті қорғау және дамыту агенттігі ұн, кеспе, құс етін өндірушілер арасындағы жасырын келісімдерді әшкерелеп, Қостанай және Алматы облыстарының басшылығына алты ескерту жасалды.
Маңғыстау, Шығыс Қазақстан және Атырау облыстарының өндірушілеріне, көтерме тауар жеткізушілері мен сауда тораптарына қосымша сауда бағасын 15%-дан 10%-ға дейін төмендету ескертілді.
Облыс әкімдіктеріне тұрақтандыру қорындағы азық-түліктің бес айлық қорын қалыптастыру, азық-түлік бағасының шектеулі мөлшерін белгілеу туралы тапсырма берілді.
Дәл қазір аймақтарда қосалқы қорлар қалыптастырудың да маңызы зор. Былтырғы желтоқсан айының соңындағы деректер бойынша елімізде мұнай өнімдерінен 200,6 мың тонна бензин және 215,8 мың тонна дизель қоры жинақталыпты. Бұл мөлшер ықтимал жағдайда елдің 15 тәуліктік қажеттілігін жаппақ...
Бірінші қолданыстағы тұрмыстық заттар мен азық-түлік нарқына қайта тоқталуымыз керек. Жоғарыда айтып өткеніміздей, ел ішінде акциямен сатылатын тауарға деген сұраныс артып отырғаны айдан анық.
Бұл орайда әуелі азық-түлік, киім-кешек және аяқ киім көбірек сатып алынады. Ал зоотауар мен дәрі-дәрмекке және автомобильге деген сұраныс көп төмендеген.
«Ораза-намаз тоқтықта» демекші, халықтың соңғы кезеңде қаржысын толықтай азық-түлікке жұмсайтыны байқалады. Бір сөзбен айтқанда, ел тұрғындарының басында біраз қиналғанымен, етектен тартқан қымбатшылыққа көндігіп, оны жеңуге бейімделіп қалғаны байқалады.
Дегенмен бұл да қымбатшылықты жеңудің басты постулаты бола алмайды. Осы орайда жаңа үкіметтің де соңғы кезде қатты күшейе бастаған қымбатшылықты тежеудің іс-шарасын қарқынды жүргізуі қажет екені белгілі.
Өмірзақ МҰҚАЙ
"Tenge Monitor" газеті
1384 рет
көрсетілді0
пікір