Qazaq gazetteri TV
24 Ақпан, 2022

Алматыда «Премьералар апталығының» тұсауы кесілді

М.Әуезов атындағы Қазақ ұлттық драма театрында екінші рет өткізіліп отырған «Премьералар апталығының» тұсауы кесілді. Ұлттық театр сахнасында 23-26 ақпан аралығында төрт күн бойы бес спектакль (бір кеште екі моноспектакль) өз көрермендерін жағымды жаңалығымен қуантпақ.

Премьера апталығының алғашқы күні – 23 ақпан күні баспасөз конференциясынан бастау алды. Баспасөз конференциясына М.Әуезов атындағы Қазақ ұлттық драма театрының көркемдік жетекшісі, КСРО Халық артисі – Асанәлі Әшімов, М.Әуезов атындағы Қазақ ұлттық драма театрының директоры, Қазақстанның еңбек сіңірген қайраткері – Еркін Жуасбек, «Қан мен тер. Ақбала» трагедиясының қоюшы-режиссері – Аридаш Оспанбаева, «Қытайдан жеткен сәлемдеме» драмасының қоюшы-режиссері – Алена Қабдешова қатысты.
Айта кететін жайт, ұлттық театр премьера апталығының аясында жағымды жаңалықтарымен бөлісіп, театрдың жаңа логотипі мен сайтының ресми таныстырылымын өткізді. Шара барысында спикерлер БАҚ өкілдерінің көкейіндегі сұрақтарына жауап беріп, жаңа қойылымдардың бүгінгі қоғам үшін маңызы, жанры мен стильдік ерекшеліктері, актерлік құрамы сынды мәселелерді талқылады. Сонымен бірге, қатысушылар алда көрсетілімі болатын премьералар ұлттық театрдың репертуарына табысты спектакль болып енетініне сенім білдірді.

Баспасөз конференциясынан кейін сағат 18.30-да режиссер Аридаш Оспанбаева сахналаған Әбдіжәміл Нұрпейісовтің (сахналық нұсқасын жасаған – Мадина Омарова) «Қан мен тер. Ақбала» трагедиясы көрерменге ұсынылды.

“Премьералар апталығының” шымылдығын түрген "ҚАН мен ТЕР. АҚБАЛА” спектаклі жоғары деңгейде өтті. Премьераға Қазақстан Республикасының Мәдениет және спорт министрі Дәурен Әскербекұлы Абаев бастаған қонақтар қатарында еліміздің мәдениет және өнер саласының белді өкілдері, театр басшылары, бірнеше өнер ұжымы бой көрсетті.
Спектакль көрсетілімінен соң, М.Әуезов атындағы Қазақ ұлттық драма театрына Қазақстан Республикасы Мәдениет және спорт министрлігі атынан ықылас гүлі жолданды. Сонымен қатар, театр ұжымын сәтті премьерасымен Алматы қаласының әкімдігі де ықылас гүлімен құттықтады.