• АҚПАРАТ АҒЫНЫ
• 22 Қыркүйек, 2023

Біз жаңа әрі креативті медианың дамуына әрқашан қолдау көрсетеміз–Аида Балаева

Елордада БАҚ өкілдері арасындағы дәстүрлі Urker-2023 байқауының жеңімпаздарын жариялауға арналған салтанатты шара өтті.

«Мемлекет басшысы Түркістанда өткен ұлттық құрылтайда масс-медианың маңызын ерекше атап өтті. БАҚ саласы үнемі Президенттің назарында, ерекше бақылауында. Биыл ақпарат саласында бірқатар құжаттар қабылданған жыл болды. Ең бастысы, мемлекеттік ақпараттық саясаттың негізін айқындайтын құжат – Доктрина қабылданды. Қоғам үшін оның ішінде өскелең ұрпақты ақпарат қауіпсіздігі тұрғысынан қорғауға бағытталған заңды бекіттік», – деді Мәдениет және ақпарат министрі Аида Балаева салтанатты шараның ашылуында.

Ведомство басшысының айтуынша, БАҚ саласында қабылданып жатқан жаңашылдықтар ел игілігіне қызмет ететін болады.

«Соңғы бірнеше күн бойы Astana Media Week шарасы аясында медиа саласы мәселелері жан-жақты талқыланды. Оған отандық және шетелдік үздік сарапшылар қатысты. Айтулы шараның қорытындысы ретінде Urker сыйлығы өтіп жатыр. Әр жыл сайын Urker-дің өз жаңалығы болады. Биыл байқауға 3 жаңа номинация қосылды. Біз жаңа әрі креативті медианың дамуына әрқашан қолдау көрсетеміз», –дейді министр.

А.Балаеваның мәліметінше, биыл конкурсқа қатысуға рекордтық көлемде – 450 өтінім түсті. Осы уақытқа дейін жалпы 74 БАҚ өкілі байқау жеңімпазы атанған.

«Таңдау оңай болған жоқ. Дегенмен, біздің қазылар алқасы өз шешімімен үздіктердің үздігін анықтағанына сенімдіміз. Олардың әрқайсысына қажырлы еңбегі үшін бөлек алғыс айтамын», – деді Мәдениет және ақпарат министрі.