• Безбен
• 08 Тамыз, 2024

Әуе қорғанысы күштерінде әскери міндеттілердің жиыны өтуде

ҚР ҚК Әуе қорғанысы күштеріне қарасты 55065 әскери бөліміне Алматы облысының Іле және Еңбекшіқазақ аудандарының қорғаныс істері жөніндегі бөлімдерінен шақырылған әскери міндеттілер келді. Бұл туралы Қорғаныс министрлігі хабарлады. 

141 әскери міндетті бір ай бойы әскери білімдері мен дағдыларын жетілдіреді. Дәріс сабақтарынан кейін жиынға қатысушылар жөндеу ротасында практикалық кезеңнен өтеді. Онда олар әскери техниканы жүйелі тексерумен, жұмыс барысында туындаған ұсақ ақауларды жөндеумен және профилактикалық жұмыстармен айналысатын болады.

Жөндеу ротасы жауынгерлік техниканың үздіксіз жұмысын қамтамасыз етіп, әскери бөлімшелердің ұдайы жауынгерлік дайындықта болуына мүмкіндік береді. Ал техниканы сапалы жөндеу және техникалық қызмет көрсету әскери қызметшілердің қауіпсіздігін арттырады.

Жиынға қатысушылардың арасындағы әскер қатарында болмаған азаматтар әскери ант берді. 55065 әскери бөлімінің командирі полковник Ерік Қожабаев Отанды қорғау әрбір азаматтың қасиетті парызы және міндеті екенін атап өтті. 

Салтанатты рәсімге Қарулы күштердің ардагерлері қатысты.

Фото: gov.kz