• Шартарап
• 14 Сәуір, 2025

Душанбеде академик Қаныш Сәтпаевты еске алу рәсімі өтті

Геология, сейсмологиялық құрылыс және сейсмология институтында тәжік академиялық ғылымының қызметін ұйымдастыруға үлкен үлес қосқан, сонымен қатар бүкіл Орталық Азия аймағында геологиялық зерттеулермен танымал, Тәжікстан Ғылым академиясының тұңғыш құрметті академигі, көрнекті қазақстандық ғалым Қаныш Имантайұлы Сәтпаевтың естелік мемориалдық тақтасының жанына гүл шоқтарын қою рәсімі өтті. Бұл туралы Сыртқы істер министрлігінің баспасөз қызметі хабарлайды.

Іс-шараға Қазақстанның Тәжікстандағы Елшісі Уәлихан Төреханов, Тәжікстан Ұлттық ғылым академиясының Вице-Президенті Ильхом Амонзода, Тәжікстанның Геология, сейсмологиялық құрылыс және сейсмология институтының басшылығы мен ұжымы, Қазақстан елшілігінің қызметкерлері, ғылыми қоғам және БАҚ өкілдері қатысты.

Өзінің сөзінде У. Төреханов Ұлттық ғылым академиясы мен институт басшылығына Қ. Сәтпаевты тәжік жерінде еске алуға мүмкіндік берген іс-шараны ұйымдастыруға ықпалдастық көрсеткені үшін алғыс айтып, ғылым саласындағы қазақ-тәжік қатынастарының серпінді дами беретініне сенімдік білдірді.

И. Амонзода академик Қ. Сәтпаев қызметінің Тәжікстандағы үлкен рөлін, сонымен бірге оның өмірі, ғылымға қызмет етуі тек жас геологтар ұрпағына ғана емес, одан басқа да ғылым бағыттарында да үлгі екенін және болашақта да үлгі болатынын атап өтті.

Қ. Сәтпаевтың естелік мемориалдық тақтасы 2018 жылғы 13 сәуірде Қазақстанның Тәжікстандағы Елшілігінің бастамасымен Тәжікстан және Ұлттық ғылым академиясы басшылығының қолдауымен ашылған болатын.