• Безбен
• 01 Шілде, 2025

Қорғалжында балаларға арналған Климаттық мектеп ашылды

Қорғалжын мемлекеттік табиғи қорығының аумағында балаларға арналған Климаттық мектептің ашылды. Бұл туралы Экология және табиғи ресурстар министрлігінің баспасөз қызметіне сілтеме жасап kazgazeta.kz хабарлайды. 

Іс-шара Жаһандық Экологиялық Қордың (ЖЭҚ) және БҰҰДБ шағын гранттар бағдарламасының қолдауымен өтті.

Климаттық мектеп шеңберінде Қазақстанның сегіз өңірінен 20 оқушы мен педагогтар 10 күн ішінде климаттың өзгеруіне бейімделудің практикалық шараларымен, жаңартылатын энергия көздерінің технологияларымен және Теңіз-Қорғалжын өңірінің биоалуантүрлілігімен танысатын болады.

Мектеп БҰҰДБ-ЖЭҚ шағын гранттар бағдарламасының 7-кезеңі шеңберінде қолдау тапқан Қорғалжын экологиялық обсерваториясы бастамасының бөлігі болып табылады. Алынған гранттың арқасында обсерваторияда оқу блогының энергия шығынын толық қамтамасыз ететін күн электр станциясы, тұрғын үй ғимаратындағы жылу сорғылары, сондай-ақ жел қондырғысы орнатылған.

Іс-шара аясында БҰҰДБ мұғалімдерге жаңартылған «Климаттық қораптың» 10 жиынтығын-климаттың өзгеруі тақырыбын оқытуға арналған әдістемелік материалдар мен практикалық ұсыныстарды қамтитын білім беру жинағын берді. Бұл құрал мектеп оқушыларына климаттық қиындықтарды түсінуге көмектеседі және қоршаған ортаны қорғауда шешімдер мен белсенді әрекеттерді іздеуге ынталандырады.

Фото:gov.kz