- Біздің сұхбат
- 18 Маусым, 2015
Әзімбай Ғали: «Колбин және Мәскеудің ұстанымдары ұлт пен ұлтжандылыққа соққы болды...»
Егемендік таңы тарихи үрдістерге қайта қарап, тәуелсіздік тұрғысынан баға беру қажеттігін тудырып отыр. Кезіндегі қызыл империяның солшыл саясаты салдарынан бұрмаланып, тарихи тағылымдамада өңі өзгертіліп жазылған әрбір тарихи сәтке бүгінгі қазақ қоғамының көзқарасы қандай болуы керек деген сұрақ күн тәртібіне шығып отыр. Сондай тарихи кезеңдердің бірі – ХХ ғасырдың соңғы кезеңінде КСРО көлемінде жүргізілген «Қайта құру саясаты» туралы тарих ғылымдарының докторы, профессор Әзімбай Ғалидың пікірін білген едік...
– Кеңес үкіметі тұсында «қайта құру» саясаты ХХ ғасырдың екінші жартысынан бастап көрініс бере бастады. Мұндай бастамалар көтеріп, қоғамды, жалпы алып империяны қайта құрудың қандай қажеттілігі болды?
– КСРО кезінде алғаш рет «қайта құру» үдерісі 1956-1957 жылдары жүргізілді. Қайта құрудың көздеген мақсаттары ауқымды болғанмен, Хрущевтің баяндамасынан аса алмады. Өйткені, бұл қайта құру саяси трансформацияны, тоталитаризмді жоюы ықтимал еді. КСРО-ны қайта құру дегеніміз коммунистік жүйені толығымен жойып, КСРО-ны құлатумен тең еді. Бірінші «қайта құруда» жариялылықтың керектігі туындады. Еуропадағы халықтық демократиялар, социалистік республикалардың ықпалы, Варшава әскери саяси одағын жоққа шығару экономикалық өзара көмектесу пәрменсіздігін дәлелдей бастады. Студенттер наразылығы демонстрацияларға, ал, демонстрациялар көтеріліске ұласты. Алдымен, Венгрияда КСРО-ға қарсы дүрлігу басталды. Оның соңы Кеңес үкіметінің Венгриядағы көтерілісті жергілікті билікпен бірге тұншықтыруымен аяқталды. Кеңес Одағына наразылық Польшада жалғасын тапты. «Хрущев жылымығы» Ресейге де, өзге де одақтас республикаларға тарап кетті. Н.Хрущев кезінде ашық түрде жүргізілген орыстандыру саясатына өзге ұлттардың қарсылығы байқала бастады. Орыс шовинизмі белең ала бастады. Ұлттық республикаларда – Грузияда, Балтық жағалауы елдерінде, Кавказда, Орта Азия мен Қазақстанда орысты сыйламайды деген жала жабу күшейіп, бұл туралы «Правда», «Известия» газеттері жаза бастады. Өзбекстанның, Грузияның элитасы, 1986 жылдан бастап қазақ элитасын қатты қудалады. Сол кезде ең үлкен ХІХ- партиялық конференция өткізіліп, әміршіл-әкімшілік тәртіпті күшейту, экономиканы жетілдіру мақсаты көзделді. Сондай-ақ, қайта құру кезінде жариялылық керек делінді. Сәйкесінше, барлық реформаларды қайта құру керек болды. Әсіресе, концептуалды мәселелерді қайта қарау, еркіндік беру, сөз бостандығы мен плюрализм керек деген мәселе көтерілді. Ескі әкімшілік авторитаризмнен жаппай демократияға көшу үрдісі басталды. Демократияның дамуы нәтижесінде ұлттық республикалар күшейді. Осы кезеңде жаңа публицистік толқын пайда болды. Сол толқында мен де болдым. Жаңа келген толқын саяси, ашаршылық мәселелерін көтере бастады. Мұндай толқын өзге одақтас республикаларда пайда болды. Жас экономист Ерлан Арын: «Әр республиканың өз экономикалық мүддесі сақталу керек», – деген ұран тастаған еді. Сөйтіп, «қайта құру» саясатының соңы Кеңес одағының ыдырауымен аяқталды. Ал, біздің қазіргі Президент Н. Назарбаев Қазақстанның территориялық статусын сақтап қалды.
– «Қайта құру» саясатының қазақ халқының қоғамдық өміріне қандай ықпалы болды?
– Мәселен, біздің елде қазақ тілінің қорғаушысы ретінде Сәбит Мұқанов көрінді. Қазақ газеттері – «Қазақ әдебиеті», «Әдебиет және искусство» өзекті проблемаларды батыл айтты. Алайда, 1956 жылы 10 желтоқсанда Қазақстанның Орталық комитеті қарарында «Қазақ әдебиеті» газетіне ұлтшыл деген айып тағылды. Сонымен бірге, КСРО-дағы экономикалық реформалар да тоқтатылып, жылымық жылдардың соңы Хрущевтің биліктен кетуіне алып келді. Себебі, КСРО-да экономикалық тоқырау қаупі күшті болған еді. Бірақ, «Хрущев жылымығы» Қазақстанға да оң әсер еткенін де айта кету керек. Бұл кезеңде, яғни, 1960-шы жылдары шығармашыл, ұлтжанды жастар өсіп шықты. Қазақ интеллигенциясы мен ұлтшыл жастары оянып, батыл ой айтып, ұлт жолында күресуге талпынды. 1963 жылы Мәскеу қаласында қазақ студенттері «Жас тұлпар» ұйымын құрып, ортақ мүдде төңірегіне біріге бастады. Бұл ұйымның қоғамға ықпалы өте күшті болып, жастар арасынан үн қосушылар, қолдаушылар қатары көбейді. Алайда, қатаң кеңестік жүйе қайтадан кері тарту мен бәсең репрессия жүргізді. Өйткені, ұлттардың бұлайша бас көтеруіне қалай да жол бермеу – сол кездегі саясаттың басты ұстанымы болатын. Сонымен, жылымықтың тағы бірінші кезеңі осылайша өтті. Ал, екінші кезеңінде 1986 жылғы Желтоқсан көтерілісінің ызғары бәрімізге аян. Кеңестік биліктің қазақ халқы мен студент жастарына жасаған репрессиясы ұлт пен ұлтжандылыққа үлкен соққы болып, аямай жаныштады. Қайта құру саясатының екінші кезеңі 1985 жылғы Коммунистік партияның Орталық комитетінің пленумындағы қайта реформалау керек деген идеядан шықты. Сөйтіп, 1987 жылы «қайта құру» саясаты басталып, 1991 жылдың аяғында КСРО-ның тарауымен аяқталды. Қайта құрудың ең керемет жемісі – «жариялылық саясаты» болды. Жариялылықтың үлгісі Мәскеудің бұқаралық ақпарат құралдарында көрініс тапты. Мәселен, «Московские новости», «Огонёк» секілді басылымдар түйткілді мәселелерді еркін көтере бастады. Теледидардан да кейбір жабық болып келген мәселелер айтылып жүрді. Қазақстандағы осындай алғашқы басылым Әшірбек Көпішев ағамыздың бастауымен жарыққа шыққан «Арай-Заря» журналы еді. Сөйтіп, бірте-бірте ұлттық демократтар көріне бастады. Олардың ең мықты өкілдері ретінде Сағатбек Әшімбаев, Шерхан Мұртаза және Алдан Айымбетов есімдерін ерекше атауға болады. Жас журналистер арасынан Серік Мәлеев көзге түсті. Бұқаралық ақпарат құралдарында тарих, демография, саясат, мәдениет, қазақ тілі мәселелері жиі айтылып, жазылды.
1990 жылдардың басында Қазақстан мен Ресей экономикалық және әлеуметтік реформалар жүргізді. 2002 жылы Қазақстан өзінің нарықтық қоғамның институттарын орнықтырып, нарықтық-әлеуметтік экономика орнатты. Жекеменшік берілді, әлеуметтік реформалар жүргізді, экономикалық реформа мен зейнетақы жүйесі реттелді. Бұл идеялардың негізгісі қайта құру кезеңінде айтылған еді.
– Қайта құру саясаты Ресей элитасының арасында қатты сынға ұшырап жатыр. Мұның мәнісі неде деп ойлайсыз?!
– Менің ойымша, қазір Ресей аумағында үшінші «қайта құру» басталып келе жатыр. Ол Украинаның Майданынан бастау алды. Ресей мен Украина арасындағы шиеленісті посткеңестік кеңістіктегі тағы бір қайта құрудың көрінісі деуге болады. Ресейдің консервативті көзқарастағы элитасы, ұлтшылдары империя құруды аңсайды. «Үшінші қайта құру» саясаты ақпараттық сипат алуда. 2014 жылы қайтадан қырғи-қабақ соғыс басталып, әлем елдері: АҚШ, ЕуроОдақ, Австралия, Жапония секілді мемлекеттер Ресейге жабылуда. Мұны үшінші «қайта құру» революциясы немесе екінші қырғи-қабақ соғыс деп айтуға болады. Ресейдің кейбір бұқаралық ақпарат құралдары мен саяси элитасы Ресейді империялық тұрғыда қайта құру саясатына жақын позицияны ұстануда. Сондықтан, Кеңес үкіметінің ыдырауына алып келген Горбачевтің «қайта құруына» сыни пікірде деп ойлаймын.
– Қазіргі қазақ қоғамының қайта құру саясатына деген көзқарасы қандай болуы керек? Тарихнамада бұл саясат әділ бағасын алып жүр ме?
– Менің ойымша, қайта құру кезінде үлкен жетістікке жетті. Ол ұлт-азаттық, рухани қозғалыс пайда болды. Оның жарқын өкілдері ретінде үш тұлғаның ролін айтпақпын. Олар Сағатбек Әшімбаев, Алдан Айымбетов, Шерхан Мұртаза. Қазіргі кезде де осы үрдіс жалғасып келеді. Қоғамда Ресейдің кез-келген саясатын сынау байқалады. Ал, қайта құру саясатына қазақ тарихнамасының өз көзқарасы, өз бағасы болуы керек.
Сұхбатты жүргізген Жания ӘБДІБЕК
1566 рет
көрсетілді0
пікір