• УЙҒУР АВАЗИ
• 02 Шілде, 2010

Көрнәклик композиторни әслигәндә...

Өткән һәптидә Қ.Ғоҗамияров намидики җумһурийәтлик дөләт Уйғур музыкилиқ комедия театрида пүткүл аңлиқ һаятини миллий сәнъитимиз тәрәққиятиға беғишлиған маһир сазәндә вә көрнәклик композитор Зәйнуллам Сетәковниң туғулғининиң 75 жиллиғиға беғишланған хатирә кечи болуп өтти. Тамашибинлар униңда мәрһумниң Хелил Һәмраев, Абдукерим Ғәниев, Махмут Абдурахманов, Ташполат Намәтов қатарлиқ шаирларниң мәтинлиригә йезилған йеқимлиқ нахшилирини тиңшап, бәһримән болушти.

Кәчни театрниң мудири Адилҗан Җанбақиев билән униң орунбасари Турғанҗан Розахунов киришмә сөз билән ечип, Зәйнуллам Сетәковниң иҗадий паалийити тоғрилиқ қисқичә ейтип өтти. Натиқлар шундақла бу чарә-тәдбирниң бийилқи театр мәвсүминиң йепилишиға тоғра кәлгәнлигини алаһидә тәкитләп, шу мунасивәт билән театр һамийлири билән җан көйәрлиригә сәмимий миннәтдарлиғини билдүрди вә уларниң бир топиға сәнъәт дәргаһи намидин соғиларни тапшурди. Андин новәт сазәндә, нахшичи вә уссулчиларға берилди. «Нава» ансамблиниң җор болушида Қазақстанниң хизмәт көрсәткән артисти Марат Мәмәтбақиев, талантлиқ нахшичилар Саһидәм Мәшрәпова, Нурәләм Қурванбақиева, Дилбәр Бурһанова, Пәрһат Давутов, Долқун Аманбаев, Луиза Розахунова, Саһидәм Шарипова вә Фурқәт Зайировлар композитор Зәйнуллам Сетәковниң иҗадиға мәнсүп тамашибин қәлбигә йеқин нахшиларни бабиға йәткүзүп орунлиди. Әнди «Рухсарә» ансамблиниң уссулчилири болса, шох вә әвришим уссуллири билән концертни техиму җанландурди.

Шуни алаһидә қәйт қилиш лазимки, Зәйнуллам Сетәковниң пәрзәнтлири Һебибуллам билән Әбәйдулламму атисиниң изини бесип, композитор болуп йетилди. Болупму бу җәһәттин Һебибуллам Сетәковниң исми пәқәт җумһурийитимизгила әмәс, бир қатар чәт әлләргиму яхши мәлум. Бу күни өзлириниң йеқимлиқ авазлири билән тамашибинларни мәһлия қилған Зәйнуллам акиниң нәврилири Меһруллам, Лутпуллам вә Сәйяриләр Сетәковлар әвладиниң һәқиқәтәнму сәнъәткарлар сулалиси екәнлигини йәнә бир қетим рошән испатлиди.

Кәч ахирида сәһнигә Зәйнуллам Сетәковниң рәпиқиси, атақлиқ сәнъәткар Қазақстан хәлиқ артисти Нурбүви Мәмәтова көтирилгәндә, тамашибинлар уни гүлдүрлигән алқишлири билән қарши алди. У дәсләп мухлислири сөйүп тиңшайдиған нахшилиридин бирини орунлиди. Андин мәзкүр кәчни уюштурған театр коллективиға, тамашибинларға чәксиз миннәтдарлиғини билдүрди. Униңдин кейин сөз новитини алған Алмута шәһәрлик Уйғур мәдәнийәт мәркизиниң рәиси Абдуллам Һошуров Сетәковлар әвлади намиға иллиқ пикирлирини изһар қилип, Нурбүви һәдиниң йеқин арида тарихий вәтинимизни зиярәт қилип, дәм елип қайтишиниң хираҗитини өз зиммисигә алидиғанлиғини билдүрди.

Кәч давамида тамашибинлар көрнәклик композитор һаятиниң намәлум қир-сирлиридин хәвәрдар болупла қалмай, униң та бүгүнки күнгичә әһмийитини йоқатмай келиватқан нахша-аһаңлиридин бәһримән болуп қайтти.

Ершат ӘСМӘТОВ.