• УЙҒУР АВАЗИ
• 09 Шілде, 2010

«Һаятимму, хизмитимму мәзмунлуқ болди»

Истипадики майор, узун жиллар давамида партия, комсомол органлирида вә Дөләт бехәтәрлиги комитетида ишлигән, һазир нәврә очумидин су ичип, қерилиқ гәштини сүрүватқан Насир ака АБДРИМОВ 70-баһарини қарши алди. Шу мунасивәт билән уни сөһбәткә җәлип қилдуқ:

— Насир ака, сиз мутәхәссислигиңиз бойичә зооветеринар екәнсиз. Қандақларчә һәрбий болуп қалдиңиз?

— У чағларда мәктәпни тамамлап, йеза егилигидә ишләп, өзини көрсәткән яшларни колхоз-совхозларниң йолланмиси билән оқушқа әвитәтти. Мениң, қандақла қилип болмисун, бирәр оқуш орниға чүшүп, алий билим елиш истигим күчлүк еди. Шуңлашқа «мән мону оқушқа бараттим» демәйла йолға раван болдум. Алмута зооветеринария институтини тамамлап, йолланма билән Шәрқий Қазақстан вилайитиниң Курчум наһийәсидики «Высокогорский» совхозиға бардим. Бу 1964-жили еди.

— У йәрдә бир жил ишлигәндин кейин өзәмниң жутуға — Уйғур наһийәсиниң Ават йезисиға қайтип кәлдим вә мени наһийәлик комсомол комитетиға ишқа тәклип қилди. Бу йәрдә 1965-жилдин 1967-жилғичә ишлидим, андин наһийәлик партия комитетиниң тәвсийәсигә бенаән дөләт бехәтәрлиги комитетиға ишқа қобул қилиндим.

— Мундақ мәсъулийәтлик ишқа иккиниң бирини қобул қиливәрмәйдиғу?

— Бу хизмәткә қанчилик лайиқ екәнлигимни билмәймән. Һәр һалда, комсомолда паалийәт елип барған жиллирим яшларни җәмийәткә налайиқ ишлардин жирақ болушқа, әвәтилгән хаталиқлирини өз вақтида түзитишкә, қанунсиз һәрикәтләргә мурассәсиз болушқа дәвәт қилиш охшаш ишларда бир аз тәҗрибә топлиған едим. Шуңлашқа болса керәк, наһийәдә яшлар арисидики җинайәтчилик кәскин азийип, өз ара достлуқ, қериндашлиқ мунасивәтләр тәләп дәриҗисидә болди. Қисқиси, вақит билән һесаплашмай ишлидуқ десәмму болиду.

Дөләт бехәтәрлиги органлирида 1967-жилдин 1991-жилғичә ишләп, һөрмәтлик дәм елишқа чиқтим. Дәсләп Уйғур наһийәси, андин Кегән, Челәк наһийәлиридә ишләшкә тоғра кәлди.

— Бу саһадики паалийитиңиз  һәққидә толуқ ейтип берәлмисиңиз керәк?

— Биз асасән әлниң хатирҗәмлигигә дәхил йәткүзидиған һәр хил җинайәтләрниң алдини елиш, дөләт чегарисиниң бузулушиға йол қоймаслиқ охшаш ишлар билән шуғулландуқ. Бир күни Ғалҗат йенида чегариниң бузулғанлиғи тоғрилиқ хәвәр кәлди. Тәкшүрүш җәриянида  чошқиниң излириға дуч кәлдуқ. Бу биздә гуман пәйда қилғанлиқтин, дәрһал издәштүрүш топини һәрикәткә кәлтүрдуқ. Нәтиҗисидә дөләт чегарисини бузған җинайәтчи Кәтмән йезисиниң четидә йошурунуп ятқан йеридә қолға елинди.

— Бу ейтип бәргиниңиз силәрниң паалийитиңларниң пәқәт бирла көрүнүши. Һәр һалда, сизниң әмгигиңиз жуқури баһалинип, берилгән мукапатлар хизмитиңизниң дайим әла дәриҗидә болғанлиғидин далаләт бәрсә керәк.

— Дөләт бехәтәрлигини һимайә қилиш саһасида әҗайип бир җасарәт көрсәттим, дәп ейталмаймән. Бирақ өзәмгә тапшурулған ишниң һөддисидин чиқип, бир кишилик вәзипәмни орунлидим, дәп ойлаймән. Буниңға мисал сүпитидә шу чағлардики СССР Дөләт бехәтәрлиги комитетиниң рәиси Ю.Андроповниң имзаси бар шәхсий қурал, икки қетим «Җасарити үчүн» медали, үч мәртә «Дөләт чегарисини һимайә қилишта үлгә көрсәткәнлиги үчүн» медали, СССР Дөләт бехәтәрлиги комитетиниң Һөрмәт грамотиси билән тәғдирләнгәнлигимни ейтсам ошуқлуқ қилмас.

Қисқичә ейтсам, өткән өмрүмдин, хизмитимдин разимән. Рәпиқәм Зәйтүнәм иккимиз бәш бала көрүп, қатарға қоштуқ, һәммиси алий билимлик. Йәттә нәврә сөйдуқ. Һазир Алмута шәһиридә хатирҗәм яшаватимиз.

Сөһбәтләшкән

Мәһәмәтҗан ҺАПИЗОВ.