• УЙҒУР АВАЗИ
• 16 Шілде, 2010

Дәсләпки вагонлар кәлтүрүлди

Йеқинда Алмута метрополитениға вагонларниң дәсләпки түркүми кәлтүрүлди. Уларни тәнтәнилик тапшурувелиш мәрасимиға җәнубий пайтәхт һакими Ахметжан Есимов, Hyundaі корпорациясиниң президенти Ким Енг Нам, шәһәр һакиминиң орунбасари Виктор Долженков, шәһәрлик йолувчилар транспорти вә автомобиль йоллири башқармисиниң башлиғи Владимир Меренков, «Метрополитен» дөләт карханисиниң мудири Мурат Өкшебаевлар қатнашти. 

Йеңи вагонларни Hyundaі корпорацияси барлиқ техникилиқ тәләпләрни һесапқа елип, мәхсус Алмута метрополитени үчүн ишләп чиқарди. Уларниң дизайни сериқ-һаварәң рәңдә орунланди, бу болса, Қазақстанниң дөләт рәмизлирини әслитиду. Тәркип 940 орунлуқ болуп, униң умумий узунлуғи 77,80 метрни тәшкил қилиду. Илдамлиғи — саатиға 80 километр. Шу нәрсә диққәткә сазавәрки, вагонларниң биридин-биригә өтүшкә болиду, бу болса, заманивий йәр асти транспортиниң асасий өлчәмлириниң бири. У пәқәт йолувчилар үчүн қолайлиқ шараит яритип қоймайла, шундақла уларниң бехәтәрлигиниму тәминләйду.

—   Дөләт рәһбири Нурсултан Назарбаевниң тапшуруғиға бенаән биз метрополитенни пайдилинишқа бериш ишлирини басқучлуқ жүргүзүватимиз, — деди Ахметжан Есимов. — Улар тәстиқләнгән графикқа қәтъий әмәл қилинған һалда жүргүзүлүватиду. Шуниңға ишәнчимиз камилки, келәр жили мустәқиллигимизниң 20 жиллиғиға қәдәр Алмута метрополитени ишқа қошулуп, шәһәр турғунлири билән униң меһманлириға хизмәт қилиду.

Мәрасимға жиғилғанлар 16 вагондин ибарәт дәсләпки төрт тәркипни намайиш қилди. Йәнә үч тәркип мошу жилниң август-сентябрь айлирида йәткүзүлиду.

Һазирқи вақитта җәнубий пайтәхт метрополитениниң төрт станциясидә пәдәзләш ишлири тамамланди. Қалған үч станциясидә мундақ ишлар давамлаштурулмақта. Шундақла Алмута йәр асти транспортини техиму тәрәққий әткүзүш бойичә техникилиқ-ихтисадий асаслаш плани ишлиниватиду, униңда биринчи линияни Абай проспекти бойичә «Қалқаман-3» микрорайониғичә вә «Райимбек батыр» станциясидин 1-Алмута вокзалиғичә йәткүзүш көздә тутулған. Униңдин ташқири, «Думан» микрорайонидин Алмутиниң Мәркизий истираһәт беғи арқилиқ Төле би кочиси бойичә «Орбита» микрорайониғичә йәткүзүш планлиниватиду.

Қисқиси, шәһәрниң транспорт системисини комплекслиқ тәрәққий әткүзүш көздә тутулмақта. Бу болса, өз новитидә, униң транспорт тармиғиниң ишлишини хелә йеникләштүриду. Чүнки метрониң Райимбек проспекти вә Фурманов кочиси билән Абай — Гагарин проспектлириниң қийилишиғичә болған биринчи новити пайдилинишқа берилгәндин кейин, мошу йөнилиштә қатнап, бир-бирини тәкрарлаватқан барлиқ автобус маршрутлири йолувчиларни пәқәт метрониң ахирқи станциялиригичила йәткүзидиған болиду.   

Шөһрәт МӘСИМОВ.