АҚПАРАТ АҒЫНЫ
18 Маусым, 2016

Фермер ауыл шаруашылығын дамытуға Ұлттық қордан қаржы бөлуді ұсынды

Алматы облысының жұртшылығымен өтiп жатқан кездесуде «Самал» шаруа қожалығының басшысы Еркінбек Ісләмов елімізде ауыл шаруашылығын дамытуға Ұлттық қордан қаржы бөлуді ұсынды, деп хабарлайды BNews.kz тiлшiсiне сілтеме жасаған Kazgazeta.kz.

«Жер мәселесі – өте күрделі, өте маңызды мәселе. Сондықтан Президентімізге мораторий жариялағаны үшін алғыс айтамын. Шетелдіктерге жерді сатуға болмайтыны жөнінде заңда нақты жазылған, оны халық біледі. Наразылық тудырып отырғаны – жалға беру мәселесі. 25 жылға емес, тіпті 10 жылға жалға беруге де өз басым қарсымын. Жерді өз азаматтарымызға сатуды да тоқтата тұру керек. Өйткені, бізде кемшіліктер, заңбұзушылықтар болып жатыр. Сол үшін жауапқа тартылып жатқан адамдар да бар», - деді Е.Ісләмов

Алайда, оның айтуынша, жерді сатып алған адамдар үшін әрі қарай сату, айырбастау құқығын қалдыру керек.

«Жерді жекеменшікке берсек, жақсы нәтижеге жетеміз деп жатыр. Онымен мен келіспеймін. Себебі, Израильде жердің 99,8 пайызы, Қытайда 100 пайызы мемлекет меншігінде. Бірақ, олар өте дамыған мемлекеттер. Израиль былтырдың өзінде 1,5 млрд долларға ауыл шаруашылығы өнімін сатқан. Еуропада жердің 70 пайызы жалда екен. Олардың да нәтижесі жақсы. Франция мен Германияда фермерлер үкімет субсидиясының арқасында мол пайдаға кенеліп отыр. Өнімнің 70-80 пайызын қолдайды екен. Егер ондай көмек болатын болса, бізде мүмкіншілік бар. Біздің жеріміз құнарлы. Табиғатымыз қолайлы. Сондықтан шетелдіктер келмесе, өзіміз игере алмаймыз деген бос сөз. Халқымыз еңбекқор, біліміміз де, тәжірибеміз де бар. Бірақ Үкіметтен қолдау керек», - деп атап өтті шаруа.+

«Қаражат жоқ деп отыр. Дәл қазір Ұлттық қорды осыған пайдалануға болмай ма екен? Дағдарыс болған кезде біз бірнеше банкті қолдадық, неге ауыл шаруашылығын солай қолдамасқа?», - деп түйіндеді ол.

731 рет

көрсетілді

пікір