• УЙҒУР АВАЗИ
• 04 Сәуір, 2011

Бала тәрбийиси — һәммигә тәәллуқ

Өсүватқан әвлатни вәтәнпәрвәрлик роһта тәрбийиләп, чоң әвлатниң мунасип избасарлиридин қилип йетилдүрүш һәр қандақ җәмийәт тәрәққиятида һәл қилғучи әһмийәткә егә мәсилидур. Мана шуниң үчүнму җумһурийитимиздә балиларға чоңқур билим, аңлиқ тәрбийә бериш мәсилисигә алаһидә көңүл бөлүнүп, һәртәрәплимә шәрт-шараитлар яритилип кәлмәктә. Бу җәһәттин Дөләт рәһбири Н.Ә. Назарбаевниң беваситә тәшәббуси билән әмәлгә ашурулуватқан чарә-тәдбирләрни әсләп өткән купайә. Җүмлидин Президентимизниң Қазақстан хәлқигә йоллиған бийилқи Мәктүбидиму дөләт тәрипидин ана билән балиға көрситиливатқан ғәмхорлуқларни буниңдин кейинму күчәйтип, вәтинигә көйүнидиған, әмгәк сөйгүч, жуқури аң-сәвийәлик әвлатни тәрбийиләп, қатарға қошушниң лазимлиғи атап көрситилди.

Йеқинда наһийәлик Мәдәнийәт өйидә болуп өткән жиғин мошу мәсилигә беғишланди. Наһийәлик Ветеранлар кеңиши тәрипидин уюштурулған мәзкүр баш қошушқа шәһәр вә йеза округлириниң һакимлири, билим бериш мәһкимилириниң рәһбәрлири, һоқуқ-тәртип қоғдаш органлириниң хадимлири, җай-җайлардики ақсақаллар кеңәшлириниң рәислири билән жигит башлири, мечит қомлириниң вәкиллири вә ветеранлар қатнашти.

Жиғинни наһийәлик мәслиһәтниң кативи Тлеуберген Оспанов киришмә сөз билән ечип, риясәтчилик қилди. Наһийәлик Ветеранлар кеңишиниң рәиси Сағинбек Үшбаев күн тәртивидики мәсилә бойичә доклад билән сөзгә чиқип, яш әвлат тәрбийисигә мунасивәтлик елип бериливатқан ишларға тәпсилий тохталди.

Наһийәдә яш өсмүрләрниң пухта билим вә аңлиқ тәрбийә елиши үчүн һәммә имканийәтләр моҗут. Оттура билим беридиған 49 мәктәптин башқа икки сәнъәт мәктиви, колледжлар билән лицейлар паалийәт елип бериватиду. Билим дәргаһлирида тәрбийәвий әһмийәткә егә болған уруш вә әмгәк ветеранлири, тонулған жутдашлар билән учришишлар, кәчләр давамлиқ өткүзүлүватиду. Мана мошундақ кәң даирилик вә мәхсәтчанлиқ билән иш елип бериш нәтиҗисидә тәлим-тәрбийә ишлирида яхши нәтиҗиләрниң қолға кәлтүрүлүватқанлиғини атап өткән орунлуқ. Оқуғучилар вилайәтлик һәм җумһурийәтлик пән олимпиадилири билән байқаш-мусабиқиларға турақлиқ қатнишип, алдинқи орунларни егиләп келиватқанлиғи әйнә шуниң испати. Бирақ шуниңға қаримастин, бала тәрбийисидә орун еливатқан камчилиқларму аз әмәс. Болупму аилә билән оқуш орунлирида назарәт һәм тәләпниң йетәрлик дәриҗидә болмаслиғи ақивитидин һәр хил дәриҗидики тәртип бузуш әһваллириниң, һәтта җинаий ишларниң йүз бериватқанлиғини йошурушқа болмайду. Наһийәлик ички ишлар бөлүми йенидики камаләт йешиға толмиғанлар иши бойичә инспекциядә 76 балиниң ройхәттә турғанлиғи тәлим-тәрбийә ишлирида камчилиқ-нуқсанларниң орун еливатқанлиғидин дерәк бериду. Болупму назарәтниң аҗизлиғидин айрим оқуғучиларниң түн бойи коча кезип жүрүши вә җәмийәтлик тәртипкә риайә қилмаслиқ әһваллири йүз бериватиду. Ичимлик һәм чекимликкә берилиш, оғрилиқ қилип, булаңчилиқ, уруш-җедәл чиқириш охшаш җинаий ишларға йол қоюлуватқанлиғи тәшвишлик әһвал. Булардин ташқири, түрлүк диний еқимлар тәсиригә чүшүп қеливатқанларму йоқ әмәс. Яш өсмүрләр вуҗудида адәмгәрчилик, достлуқ, меһир-шәпқәт, һая-номус вә башқиму инсаний хусусийәтләрни шәкилләндүрүшкә чәт әл кино мәһсулатлириниң зор сәлбий тәсир йәткүзүватқанлиғиниму йошурушқа болмайду.

Баш қошушта күн тәртивидики мәсилә бойичә «Көктал-Аришаң» санаторийисиниң баш врачи, наһийәлик мәслиһәтниң депутати Қурманжан Ахметқалиев, Пәнҗим йезиси Ақсақаллар кеңишиниң рәиси Әхмәтҗан Надиров, наһийәлик ички ишлар бөлүми башлиғиниң орунбасари Руслан Керимқулов, Яркәнт гуманитарлиқ-техникилиқ колледжиниң мудири, наһийәлик мәслиһәтниң депутати Сара Темирбаева, наһийәлик билим, тән-тәрбийә вә спорт бөлүминиң башлиғи Бағира Жазилбекова, Қоңурөлән йеза округиниң һакими Ерғали Шоқпаров, наһийәлик ата-анилар комитетиниң рәиси Еркин Қасимбеков вә башқилар музакирә сөзгә чиқип, өзлириниң пикир-тәклиплири билән ортақлашти.

Жиғинға наһийә һакими Ермек Келемсеит қатнишип, сөз сөзлиди.

Нурәхмәт ӘХМӘТОВ.

Панфилов наһийәси.