• УЙҒУР АВАЗИ
• 04 Сәуір, 2011

Батурниң жутида өткән мәрасим

Өз вақтида даңқи чиққан «Қазақстан» үзүм вә мевә совхози өзиниң алмилиқ бағлири, гөзәл тәбиити билән алаһидә пәриқлинәтти.

Исми ривайәткә айланған миллий қәһриманимиз Ғени батур һаятиниң ахирқи жиллирини нәқ мошу йезида өткүзгән болуп, униң қәбри чоң йолниң бойида. Мәрһум роһиға беғишлинип өткүзүлүп туридиған һәр хил чарә-тәдбирләрни мошу йезидики қериндашлиримизниң ярдимисиз тәсәввур қилалмаймиз.

Әйнә шундақ чарә-тәдбирләрниң биридә бир топ студент яшлар батурниң қәбрини гүлгә орап, әтрапиға 200 түп көчәт тиккән еди. Шу чағда ишниң баш-қешида болуп, йол-йоруқ көрситип жүргән мәзкүр мәлиниң жигит беши Рәшидин Сулайманов билән сөһбәтләшкинимиздә у мундақ дегән еди:

— Йезимизда көпинчә Ғени бовимизниң жутдашлири яшайду. Униң өйиниң чириғини һазир, оғли Ярмәһәмәт яндуруватиду. Шуңлашқа мошундақ чарә-тәдбирләргә жут болуп қол учини сунушқа тиришимиз.

Мошу йеқинда Рәшидин билән мәзкүр йезидики чоң кафеда йәнә учришип қалдуқ.

— Йезимиздики нураний анилиримизға, ханим-қизларға беғишланған мәдәний чарә-тәдбирни өткүзүш үчүн мошу кафени лайиқ көрдуқ, — деди у бизгә мәрасим мәхситини чүшәндүрүп.

Мәйрәмгә тәклип қилинған анилар билән ханим-қизларниң сани атмиш-йәтмиштин кам әмәс еди. Шуңлашқа:

— «Уйғур авазиға» бари-йоқи 15 — 20 адәм йезилғиниға қарап, бу жутта уйғурлар аз болса керәк, дәп ойлап жүрәттим. Ваһаләнки, хелә бар екәнсиләрғу, — дедим жигит бешиға чеқишип.

Уму һазирҗавап жигит екән, бой бәрмиди.

— Әлвәттә, аз йезилиду. Бирәр қетим һалимизни соримисаңлар, жутумиздики инавәтлик адәмләр һәққидә гезитқа язмисаңлар шундақ болиду. Бизниң жуттиму әмгиги билән йәр көкәрткән, әлниң һөрмитигә бөләнгән адәмлиримиз йетәрлик. Шуларниң ичидә дәсләп мошу йезиниң қозуғини қаққан, һалал әмгиги билән егилик ихтисадиниң тәрәққиятиға мунасип үлүш қошқан Сәмәдул Тохтахунов, Давут Савутов, Һәҗәрбүви Әмруллаева, Зинәт Илахунова, Турсунбүви Семәтова кәби мөтивәрләрниң исмини биз дайим пәхирлиниш билән тилға алимиз.

Йезимизда тохсән аилигә йеқин уйғур яшайду. Өткән жили «Уйғур авази» гезитиға пәқәт 10 аилә йезилған болса, бийил бу көрсәткүчни 32гә йәткүздуқ. Әндики жили түгәл йезилимиз дәп вәдә беримиз. Пәқәт, бизниң бар-йоқлуғимизни унтуп қалмисаңлар болди, — деди сөһбәтдишим.

Бу күни ханим-қизларни тәбрикләп кәлгән җумһурийәтлик уйғур жигит башлири кеңишиниң муавин рәиси Абдусалам Давутов, Челәк регионлуқ Уйғур мәдәнийәт мәркизиниң рәиси Турсун Һүсәнов вә мошу қурларниң муәллипи сөз елип, изгү тиләклирини изһар қилди һәм 3-апрель күни өтидиған Президент сайлимиға паал қатнишип, мәмликитимизниң келәчиги үчүн аваз беришкә чақирди. Мәрасим җәриянида йезидики Уйғур мәдәнийәт мәркизи Қазақстан йезилиқ шөбисиниң рәиси Нуруллам Илахунов, Ханим-қизлар кеңишиниң рәиси Пәридәм Семәтова, жигит бешиниң ярдәмчиси Иминҗан Илиев вә Әркин Әмруллаев мошу мәйрәмни уюштурушқа һамийлиқ қилған Тохтахун Нурумов, Алимҗан Ғоҗаев вә башқиларға сәмимий тәшәккүрини изһар қилди.

Мәрасим дағдуғилиқ саз-нәғмиләр, дилраба нахшилар, әвришим уссуллар билән наһайити көңүллүк өтти.

Мәһәмәтҗан ҺАПИЗОВ.

Әмгәкчиқазақ наһийәси.

СҮРӘТТӘ: Мәрасим иштиракчилири хатирә үчүн сүрәткә чүшти.