• УЙҒУР АВАЗИ
• 04 Сәуір, 2011

«Бу һәммимизниң умумий өйи»

Бийил қиш хелила созулди. Март ейиниң оттурисида яққан қелин қар, һәммимизни мәңдитипла қоюведи, амма һеч күтмигән йәрдин 22-март, йәни Норуз мәйримидә нурини чечип чиққан қуяш адәмләрниң баһар ейиға болған рәнҗишини бир дәмдила «жуювәтти». Өз новитидә бу Норуз мәйримини нишанлаш үчүн Алмута шәһириниң «Астана» мәйданиға жиғилғанларниң кәйпиятини көтәрди. У күни мәйданға Қазақстанда истиқамәт қиливатқан аз санлиқ милләтләр кигиз өйләрни тикип, уларда миллий таамлар көргәзмилири уюштурулди. Мәйданға жиғилған көпчилик һәр хил таамларни көрүпла қалмай, бәлки улардин еғиз тәгди. Алмута шәһәрлик Уйғур мәдәнийәт мәркизи тәрипидин тикилгән кигиз өйгә йол тутқан қериндашлар алди билән униң алдидики китап вә сүрәтләр көргәзмисини зиярәт қилди. Андин улар булуңсиз өйниң ичидә ханим-қизлар тәрипидин тәйярланған миллий таамлиримизниң дәмини тартип, уларға өзлириниң жуқури баһасини бәрди. Меһманларни қучақ йейип қарши алған Алмута шәһәрлик Уйғур мәдәнийәт мәркизиниң рәиси Абдуллам Һошуров меһманларға мәзкүр тәшкилатниң паалийити, қазақстанлиқ уйғурларниң турмуш тирикчилиги һәққидә ейтип беришниму унтимиди.

— Қазақстанда барлиқ милләтләр иҗил-инақ һаят кәчүрүватимиз, — дәп сөзини давам қилди у. — Чүнки бу бизниң умумий өйимиз. Һәр милләт өзимизниң мәдәнийитини, урпи-адәтлирини, тилимизни сақлап келиватимиз. Бу болсиму Дөләт рәһбириниң дана сәясити түпәйли әмәлгә ешиватиду. Шуңлашқа биз уни дайим қоллап-қувәтләймиз.

Меһманлар арисидин сөз алған Қазақстан хәлқи Ассамблеяси Алмута шәһәрлик кативатиниң рәһбири Әлия Турсунмуратова, мәзкүр чарә-тәдбиргә Әмгәкчиқазақ наһийәсидин мәхсус ат чаптуруп кәлгән наһийәлик Уйғур мәдәнийәт мәркизиниң рәиси Мәһәмәтҗан Җанбақиев мәйрәм иштракчилирини алдимиздики сайламға тәшкиллик билән қатнишишқа чақирди.

У күни меһманлар һәр хил милләтләр вәкиллири тәрипидин түзүлгән концерт программилириниму намайиш қилди.

Бәхтишат СОПИЕВ.

СҮРӘТТӘ: миллий таамларниң көргәзмиси.

Муәллип чүшәргән сүрәт.