• УЙҒУР АВАЗИ
• 04 Сәуір, 2011

«Йешил» шәнбилик

Норуз мәйрими һарписида, йәни 19-март күни Алмутида «Жасыл қала» акцияси башланди. Бирақ мошу күни тохтимай яққан қар шәһәрни тазилашқа вә аватлаштуруш үчүн уюштурулған шәнбиликниң тәшкилий вә жуқури дәриҗидә өтүшигә мүмкинчилик бәрмиди. Шундиму мәнзирилик дәрәқ көчәтлирини тикиш елимизниң Тунҗа Президенти Нурсултан Назарбаев намидики истираһәт беғида башлинип, андин шәһәрниң барлиқ наһийәлиридә давамлашти.

— Мәнзирилик дәрәқ көчәтлирини тикиш пүткүл әтияз пәслидә давамлишидиған болиду, — деди биз билән болған сөһбәттә Әвезов наһийәси бойичә А.Розибақиев намидики 153-мәктәп-гимназиясиниң территориясидә көчәт тикиш акциясигә қатнашқан җумһурийәтлик Уйғур мәдәнийәт мәркизи рәисиниң орунбасари Асимҗан Злавдинов. — Бүгүн биз 250 түп мәнзирилик дәрәқ көчәтлирини тиктуқ. Әнди шәһәр бойичә 2740 түп көчәт тикиш мәхсәт қилинған. Бу акциягә Алмутидики барлиқ этномәдәний бирләшмиләр паал қатнишиш истигини билдүрмәктә. Биз, ҖУММ рәһбәрлиги, бу тәшәббусни дәсләпкиләр қатарида қоллап-қувәтлидуқ.

Ейтиш керәкки, бийил шәһәр бойичә 27 миң түп мәнзирилик дәрәқ көчәтлирини тикиш күтүлмәктә.

Иврайим БАРАТОВ.