• УЙҒУР АВАЗИ
• 04 Сәуір, 2011

Концертни «Бәлли» қизитти

Бу күнләрдә елимиз мустәқиллигиниң 20 жиллиғи мунасивити билән җай-җайларда һәр хил мәдәний чарә-тәдбирләр уюштурулуп, мәзкүр сәнәни мунасип нишанлаш мәхситидә җиддий тәйярлиқ ишлири жүргүзүлмәктә.

Йеқинда И.Саттаров намидики мәктәпниң мәҗлисләр залида өткән чоң концерт программиси шу җүмлидиндур. Залға лиқ толған тамашибинлар алдида сөзгә чиққан Ғәйрәт йезисидики оттура мәктәп мудириниң тәлим-тәрбийә ишлири бойичә орунбасари Әзиз Мәрүпов мәзкүр концертниң мәхситигә қисқичә тохтилип, программиниң асасән хәлиқләр достлуғини, миллий разимәнликни, әлдики турақлиқни мустәһкәмләшкә дәвәт қилидиған шеир, нахша-саз вә уссуллардин тәркип тапқанлиғини тәкитлиди. Йезидики айрим талантлиқ яшлар билән жуқарқи синип оқуғучилири тәрипидин түзүлгән бу концерт ахирқи вақитларда чоң-чоң сәһниләрдә көрүнүп жүргән «Бәлли» топиниң җор болуши билән техиму көңүллүк вә мәзмунлуқ өтти. Концерт җәриянида оқулған яш һәвәскар шаир Абдулҗан Азнибақиевниң жутқа, достлуққа вә баһар пәслигә беғишланған шеирлириму көпчилик тәрипидин қизғин қарши елинди. Мәзкүр концерттин чүшкән хираҗәт толуғи билән йезидики Яшлар тәшкилатиниң фондиға қалдурулди.

Мәһәмәтҗан ҺАПИЗОВ.

Әмгәкчиқазақ наһийәси.