• УЙҒУР АВАЗИ
• 04 Сәуір, 2011

Мәшрәп мустәқилликниң жигирмә жиллиғиға беғишланди

Өткән һәптидә Алмута шәһиридики «Шарис» кафесида Түрксиб наһийәлик Уйғур мәдәнийәт мәркизи вә Йеңи һаят мәһәллиси жут-җамаәтчилигиниң уюштуруши билән мәшрәп болуп өтти. Мәзкүр мәрасим елимиз мустәқиллигиниң 20 жиллиғиға беғишланған бу чарә-тәдбиргә җумһурийәттә тонулған шәхсләр, җәмийәтлик тәшкилатларниң рәһбәрлири, җамаәтчилик вәкиллири билән зиялилар иштрак қилди.

Мәрасимниң тәнтәнилик қисмини киришмә сөз билән ачқан Түрксиб наһийәлик өзини өзи башқуруш комитетиниң рәиси Һосманҗан Обулов жиғилғанларни мәйрәм мунасивити билән тәбриклиди вә мошу хилдики чарә-тәдбирләрниң елимиздики хәлиқләр достлуғини мустәһкәмләштә чоң роль ойнайдиғанлиғини алаһидә тәкитлиди. Шуниңдин кейин сөз новитини алған Қазақстан Җумһурийитиниң Президентлиғиға намзат Н.Назарбаевни қоллап-қувәтләш бойичә шәһәрлик җәмийәтлик штаб рәисиниң орунбасари Махамбет Бейдали вә мәзкүр штабниң әзаси Данат Жанатаев, Түрксиб наһийәсиниң һакими Владимир Устюгов, «Нур Отан» ХДП Сәясий кеңишиниң әзаси, Қазақстан хәлқи Ассамблеяси рәисиниң орунбасари, ҖУММ рәиси Әхмәтҗан Шардинов, униң орунбасари Асимҗан Злавдинов, Әрмән этномәдәнийәт мәркизиниң рәиси Альберт Погосян вә башқилар өткән жигирмә жилда Қазақстанда қолға кәлтүрүлгән муваппәқийәтләргә, Президентниң бийил хәлиққә йоллиған Мәктүбидә, «Нур Отан» партиясиниң қурултийида Дөләт рәһбири тәрипидин илгири сүрүлгән асасий йөнилишләр билән әвзәлликләргә тохталди.

Натиқлар көпчиликни 3-апрель күни өтидиған новәттин ташқири Қазақстан Җумһурийити Президентиниң сайлимиға бир кишидәк иштрак қилишқа чақирди.

Мәрасим давамида җәмийәтлик ишларниң бир топ активистлириға җумһурийәтлик Уйғур мәдәнийәт мәркизиниң Пәхрий ярлиқлири тапшурулди.

Мәшрәп адәттикидәк, пашшап беги Сабирҗан Ғаппаров билән мәшрәп беги Иврайим Исрайиловниң рәһбәрлигидә миллий урпи-адәт, әнъәниләргә әмәл қилинған һалда өтүп, униң иштракчилириға «Дияр» ансамблиниң йеқимлиқ саз-нәғмилири арамбәхш дәмләрни һәдийә қилиду.

Ахирида «Гүлтавақ» Алмута шәһиридики Трудовик мәһәллисиниң жигит беши Азат Ақбашевқа тапшурулди.

Шәмшидин АЮПОВ.