• УЙҒУР АВАЗИ
• 04 Сәуір, 2011

Муәллимләрниң мааши өсиду

Йеқинда болуп өткән Һөкүмәт мәҗлисидә қазақстанлиқларниң билим алидиғанлиғиға, давалинидиғанлиғиға вә ишләйдиғанлиғиға аит әң муһим үч программа муһакимә қилинди.

Мәсилән, билим вә пән министри Бақытжан Жумағулов елимиз педагоглириниң инавитини көтиришни вә муәллимләрниң иш һәққини ашурушни вәдә қилди.

— Барлиқ бюджет хадимлири үчүн умумий болған иш һәққини 30 пайиз (1-июльдин тартип — Ред.) ашуруштин ташқири, — дәп тәкитлиди министр, — педагоглар үчүн қошумчә һәқ җарий қилиниду: 1-сентябрьдин тартип алий дәриҗидики муәллимләр квалификацияси үчүн асаслиқ лавазимлиқ маашиға 100 пайиз қошумчә һәқ алиду. Қалған дәриҗидики муәллимләр үчүнму қошумчә һәқ төлиниду.

Һөкүмәт мәҗлисидә шундақла саламәтликни сақлаш министри Салидат Қайирбекова балиларни давалаш үчүн медицина саһасиниң йеңи кәшпиятлириниң қандақ җарий қилинидиғанлиғи тоғрилиқ әхбарат бәрди.

— Иккинчи чарәктә Миллий педиатрия вә балилар хирургияси мәркизидә балиларниң илигини йөткәш бойичә бөлүм ечиш планлиниватиду, — дәп тәкитлиди министр.

Униңдин ташқири, министр йеза турғунлириға чапсан медицинилиқ ярдәм қилишниң нәтиҗидарлиғини ашуруш зөрүр дәп һесаплайду.

— Қатнаш қийин болған җайлардин ағриқларни йәткүзүш гражданлар авиациясини җәлип қилиш һесавиға йениклишиду, — дәп хәвәр қилди Салидат Қайирбекова. — Мошу жилниң ахириғичә регионларда 50 көчмә медицина комплекси ишләйдиған болиду.