• УЙҒУР АВАЗИ
• 04 Сәуір, 2011

Сатира вә юмор сәһиписи

Тибабәт йеңилиқлири

Һәҗвий-тәтқиқат мәркизиниң илмий хадими Абдухалиқ Уйғур саний (Абдухалиқ Махмудов) узун жиллиқ тәтқиқати нәтиҗисидә һазирға қәдәр нами вә даваси йоқ дәп қарилип кәлгән айрим ағриқларни ениқлап, улардин қутулуш амаллирини тәһриратимизға әвәтипту. Әгәр сиздиму шундақ кесәлликләр болса, оқуп дәрдиңизгә дава тапарсиз, дегән нийәт билән уни диққитиңларға тәғдим қиливатимиз.

Мә-мән кесили

Бу кесәлликкә челиққан кишиләрдә өзидин башқини тән алмаслиқ аламәтлири байқилиду. Жиғинларда минбәргә чиқип олтармиса яки сөзлимисә, додилинип мәйданни ташлап чиқип кетиш, андин у йәрдә қалғанларни яманлаш, һәр хил иғвалар тарқитиш, пурсәт тапса, һәтта қәбир үстидики митингиларда болсиму сөзләп, өч елиш һәрикәтлири сезилиду. Бош вақтини шикайәт йезиш, жут-җамаәт арисиға кирип, ғевәт қилиш билән өткүзиду.

Мә-мән кесили асасән зиялиларға хас кесәлликләр түркүмигә кириду.

Даваси: мутәхәссисләр кесәлниң пәйда болушида бәдәнниң әң алий башқурғучи әзаси болған мейә хизмитиниң бузулуши асасий роль ойнайду дәп һесаплайду.

Мә-мән кесилигә йолуққан кишигә һазирқи қиммәтчилик дәвридә дора-дәрмәк беришниңму һаҗити йоқ. Уни роһий җәһәттин давалаш керәк. Буниң үчүн униңда замандашлири арисида өзидинму талантлиқ, тәшкилатчи адәмләрниң барлиғиға ишәнчә һасил қилдуруп давалиса, гәрчә кесили еғир болсиму сақийип кетиши мүмкин.

Беһай кесили

Беһай — кеңәшләр дәвридә мәхпий тутулуп, һазир ашкарә әдәп кетип барған ховуплуқ кесәллик. Аддий тилда уни беһая, беәдәп, уятсиз, шәрмәндә кесили дәпму атайду. Бу кесәллик көпирәк яш жигит-қизлар арисида учришиду.

Бәлгүлири: қиз-жигитләрниң чоңларниң көзичә тамака чекип, һарақ ичишлири, җәмийәтлик транспортларда, вокзал вә бекәтләрдә, болупму яйма базарларда бир-бирини қучақлап, еғиз-бурун ялашлирида байқилиду. Мундақ қиз-жигитләрдә оғрилиқ, зорлуқ, паһишивазлиққа майиллиқ үстүн. Бәзи аялларниң аилиси, балилири болсиму, иккинчи бир әргә тегивелишлиридә, қизларниң турмушқа чиқмайла пәрзәнтлик болувелишлирида, жигитләрниң авахтиға сәпәр қилишлирида яққал байқилиду.

Даваси: тәркивидә инсан, шәрму-һая витаминлири мол озуқларни тохтимай истимал қилдурса тәсири күчлүк болғусидур. Беһай — алдини елиш мүмкин болған кесәллик. Униң үчүн тевип әмәс, ата-аниниң өзи жуқуридики «витаминларға» бай болуши купайидур.

1-апрель хәвәрлири

Бүгүндин башлап «Уйғур авази» гезити илгәркидәк һәптисигә бәш қетим (йәкшәнбә вә дүшәнбини һесаплимиғанда) чиқидиған болди.

***

Алмутилиқ ханим-қизларниң тәшәббуси вә уюштуруши билән әтә шәһәрдики Астана мәйданида (Абылайхан вә Төле би кочилириниң дохмуши) «Көк чөшүрә» конкурси өткүзүлиду. Униңға һәммә халиғучилар қатнишалайду. Ғалип чиққанлар маддий вә мәнивий соғилар билән мукапатлиниду.

***

Җумһурийәтлик Уйғур мәдәнийәт мәркизи ахири уйғур мәктәплирини тамамлиғучиларниң Бир туташ миллий тестни уйғур тилида тапшуруш мәсилисини һәл қилди.

***

Рус тиллиқ уйғур тамашибинлириниң тәләплиригә бенаән, пат- йеқинда Уйғур театрида классик сәһнә әсәри — «Анархан» драмиси русчә қоюлмақчи.

Сизниң сөйүмлүк ләтипиңиз

Нурлан ӘЛАХУНОВ, йеза егилиги пәнлириниң доктори, профессор:

Кардиология бөлүмидики сөһбәт:

— Кәчүрисиз, бурадәр, ахирқи вақитларда сиз күнигә қанчә бодулка пиво ичип жүрисиз?

— Төрт.

— Немишкә? Сизгә мән өткәндә пәқәт икки бодулкиғила рухсәт бериведимғу?

— Тоғра. Амма йәнә икки бодулка ичишкә терапевт рухсәт қилди әмәсму!

Реһангүл МӘХПИРОВА, Қазақстанниң хизмәт көрсәткән артисти:

Кәчқурунлуғи йолдиши иштин кәлсә, аяли:

— Қиммәтлигим, мән бир айға санаторийға берип, дәм елип кәлмәкчимән. Сизгә қандақ соға елип кәлсәм болиду? — дәпту.

Йолдиши аялини бағриға бесип:

— Алтунум, рәхмәт. Сизниң бир айға кәткиниңизниң өзи мениң үчүн чоң соға әмәсму, — дәп җавап берипту.

Зулияр САБИРОВ, радиожурналист:

Һәрбий қисимниң командири бөлмисигә кирип кәлгән пропорщикқа вақирашқа башлайду.

— Мән сизни үч қетим чақирдим. Немишкә вақтида кәлмидиңиз?

— Кәчүрисиз, йолдаш командир, аңлимай қаптимән.

— Бу банә әмәс, йолдаш прапорщик. Әгәр аңлимиған болсиңиз, маңа келип «Аңлимидим» дәп ейтип қоюшиңиз керәкти.

Әхмәтҗан МӘМӘТОВ, истипадики полковник:

Йол полициясиниң инспектори жүргүзгүчиниң һөҗҗәтлирини көрүп чиқип:

— Барлиқ һөҗҗәтлириңиз җайида. Бирақ гуванамиңизға чапланған сүрәт бизниң қаидигә тоғра кәлмәйду, — дәпту.

Жүргүзгүчи бу гәпләргә терикип:

— Йоқилаң бир нәрсигә тегишивәрмәңлара. Мошу силәр «тимақ астидин кир издәйдиғиниңларни» қачан қойисиләр. Сүритим сизгә немишкә яқмай қалди? Мону иккиси мениң әң йеқин ағинилирим. Оң тәрәптә чирайлиқ кийинип, галстук тақап турған — мән, — дәп җавап берипту.

Җавапсиз соаллар

*Әгәр пиядә меңиш пайдилиқ болса, у чағда почтальонлар немишкә мәңгү яшимайду?

*Ләһәң белиқ өмүр бойи суда үзүп, пәқәт белиқ йәп, су ичип жүрсиму, немишкә оруқлимайду?

*Тошқан жүгрәйду, сәкрәйду, умумән, дайим һәрикәттә жүриду, бирақ у немишкә пәқәт бәш жилла яшайду?

*Ташпақа жүгримәйду, сәкримәйду, аран-аран маңиду, бирақ немишкә 150 жил һаят кәчүриду?

Еланлан

Бизниң шипаханида 31 чишини жулғузған бемар 32-чишини һәқсиз жулдуруш имканийитигә егә болиду.

Мәмурийәт.

... дәп раса қатурған екән

Бир күни пешқәдәм сәнъәткар Кәрим Закиров Уйғур театридин чиқип, өйигә қайтқиливатса, униң алдиға яш актер Руслан Гайитов чиқип тамака сорапту.

— Бар, балам, — дәпту Кәрим ака униңға бир данә тамакини тутқузуп.

— Сәрәңгиңизчу?

— Мәрһәмәт.

Руслан тамакини туташтурувелип, сәрәңгини қайтуруп бериватса, Кәрим ака униңға:

— Балам, янчуғумда күлдан йоқ болуп қалди, хапа болмассән, һә?— дәп раса қатурған екән.