• УЙҒУР АВАЗИ
• 18 Шілде, 2011

Яңриди Нураләмниң нахшилири

Йеқинда Қ.Ғоҗамияров намидики җумһурийәтлик дөләт Уйғур музыкилиқ комедия театрида «Нава» ансамблиниң пешқәдәм нахшичиси Нураләм Қурванбақиеваниң 65 яшқа толуши мунасивити билән чоң концерти болуп өтти. Тәвәллуд егисиниң мухлислири у күни залға лиқ толди.

Һазирқи Әмгәкчиқазақ наһийәсиниң Қорам йезисидики оттура мәктәптә оқуп жүргән чағлиридила сәнъәткә муһәббәт бағлиған Нураләм дәсләп мәктәптики бәдиий һәвәскарлар өмиги тәркивидә ейтқан нахшилири билән жутдашлириниң алқишиға сазавәр болған еди. Андин у Өзбәкстанниң Сәмәрқәнт шәһиридики музыка училищесиниң нахша бөлүмини тамамлап, әмгәк паалийитини 1974-жили Уйғур театрида башлайду. Яш нахшичи қутлуқ сәһнимиздә Рошәнгүл Илахунова, Абдирим Әхмәдий, Сәйдәкрәм Төләгәнов (муқам иҗра қилиш сирлирини үгәткән), Қадир Рази Муһәммәтов, Халисхан Қадирова, Нурбүви Мәмәтова (хәлиқ нахшилирини үгәткән) кәби атақлиқ сәнъәткарлар билән биллә иҗат қилип, улардин нахша сәнъитиниң қир-сирлирини мукәммәл үгиниду. Шуниң үчүн хәлқимиз уни асасән хәлиқ нахшилирини бабиға йәткүзүп ейтидиған талант егиси сүпитидә тонуйду һәм униң сәһнигә чиқишини тақәтсизлик билән күтиду. Нахшичиниң иҗрасидики «Висал» муқаминиң муқәддимиси билән дастани, «Гүләмхан», «Мән сениң яриң болай», «Һәйранә», «Һәҗәп болдум», «Бом баяван» қатарлиқ нахшилар униң иҗадийитидә алаһидә орунни егиләйду. Мошу йәрдә Нураләмниң өз вақтида мәшһур композитор Қуддус Ғоҗамияровниң «Тәклимакан», «Дутар поэмиси» охшаш әсәрлиридики йәккә аһаң үчүн йезилған партияләрниму бабиға йәткүзүп орунлиғанлиғини тәкитләп өтүш орунлуқтур. Оттуз жилдин бу ян яңраватқан «Үмүт юлтузум» нахшиси (сөзи Ташполат Намәтовниң, музыкиси Зәйнуллам Сетәковниң) болса, тамашибин қәлбини һелиғичә тәвритип кәлмәктә. Нахшичи бу қетимқи концертида тамашибинлар диққитигә мәзкүр нахшилар билән биллә, Икрам Мәсимов билән Махмут Абдурахмановниң «Бәргин булақ илһам маңа», Абләһәт Исламовниң «Әсләмсән мени», Әбәйдуллам Сетәков билән Дүрнәм Мәшүрованиң «Достумға» қатарлиқ йеңи нахшиларниму һавалә қилди. Н.Қурванбақиева көп қирлиқ нахшичи сүпитидә «Нава» ансамблиниң йеқин вә чәт әлләргә (ШУАР, Португалия, Түркия) болған гастрольлуқ сәпәрлиридә шу әлләр хәлиқлириниң нахшилириниму жуқури кәспий маһарәт билән орунлиған. Концерт давамида сәнъәт сөйәр амма Нураләмниң иҗрасидики хорезимчә «Ләзги», Н.Тлендиев билән Т.Молдағалиевниң «Құстар қайтып барады» нахшилирини гүлдүрас алқишлар билән қарши алди.

Тәвәллуд егисини тәбрикләп, көплигән кәсипдашлири билән шагиртлири, җүмлидин Нуралим Варисов, Марат Норузов, Дилшат Аманбаев, Саһидәм Мәшрәпова, Луиза Розахунова, Дилбәр Бурһанова вә башқилар өзлириниң музыкилиқ салимини йоллиди.

Ершат ӘСМӘТОВ.