• УЙҒУР АВАЗИ
• 18 Шілде, 2011

Вилайәтлик конкурсқа йолланма алди

Қизил Шәриқ йезисидики «Балдәурен» балилар бағчисида 100гә йеқин бала тәрбийилиниду. Мәзкүр балилар бағчиси бу күнләрдә барлиқ әхлақий вә эстетикилиқ қаидиләргә мувапиқ безәндүрүлүп, заманивий тәләпләр дәриҗисидә җабдуқланған. Қисқиси, гөдәкләрниң вақтини көңүллүк өткүзүши, тән-тәрбийә билән шуғуллиниши, дәм елиши үчүн барлиқ шараитлар яритилған.

Наһийәдики үлгилик һесаплинидиған мәзкүр бағчә коллективи йеқинда наһийә даирисидә өткүзүлгән конкурсқа қатнишип, биринчи орунни йеңивалди. Җүмлидин «Қазақчиңиз қандақ, өсмүр?» номинацияси бойичә бәс-бәскә чүшкән балиларниң ичидә үч нәпәр уйғур пәрзәнди алаһидә пәриқлинип, бағчиниң биринчи орунға сазавәр болушиға мунасип үлүш қошти. Улар шундақла нахша ейтиш, тепишмақ тепиш вә «Алдар көсе билән шәйтанлар» сәһнә көрүнүшигә қатнишип, өз маһарәтлирини намайиш қилди. Әнди «Үлгилик балилар бағчиси» номинацияси бойичә мусабиқиға қатнашқан тәрбийичиләр Бақыткүл Омарова (бағчә башлиғи), Каминур Һашимова (методист), Кәмшат Қарағулова, Нургүл Келекеева, Толқын Анисова, Айгүл Бошенова, Гүлмира Қопашева конкурс шәртлирини толуқ орунлап, өзгиләрдин пәриқләнди. Шундақ қилип, бағчә коллективи номинацияниң бу түри бойичиму биринчиликни бәрмиди.

— Әндики сәпиримиз — Талдиқорған шәһири, — дәйду коллективиниң муваппәқийитидин пәхирләнгән мәзкүр бағчиниң психолог-тәрбийичиси Гүлферуз Нуриева. — У йәрдә вилайәтлик байқашқа қатнишимиз. Ишинимәнки, бу қетимму алдинқи орунлардин көрүнимиз.

Бала тәрбийисидәк җавапкәрлик ишта дайим алдинқи қатардин көрүнүп келиватқан мәзкүр коллективқа техиму йүксәк пәллиләр тиләймиз.

Мәһәмәтҗан ҺАПИЗОВ.

СҮРӘТТӘ: «Балдәурен» бағчисиниң тәрбийичилири.

Әмгәкчиқазақ наһийәси.