• УЙҒУР АВАЗИ
• 18 Шілде, 2011

Ишләшниму, дәм елишниму билиду

Йеқинда Махмут Қәшқәрий намидики Җамбул вилайәтлик Уйғур этномәдәнийәт мәркизи һөкүмәтлик әмәс тәшкилатларниң иҗтимаий-әһмийәтлик лайиһиләрни җанландуруш программиси даирисидә вә «Течлиқ вә бәрпакарлиқта өткән 20 жил» шиари астида этномәдәний бирләшмиләрниң активистлири үчүн дәм елиш уюштурди. Мәзкүр чарә-тәдбир Байзақ наһийәсиниң Сарыкемер йезисидики «Қарлығаш» дәм елиш лагерида өтти. Дәсләп лагерь коллективи дәм елиш үчүн кәлгәнләрни саз-нәғмә билән қарши елип, уларни сағламлаштуруш җайиниң территорияси билән тонуштурди. Андин спортниң һәр хил түрлири бойичә мусабиқилар өткүзүлүп, кәчқурунлуғи этномәдәний бирләшмиләрниң тәркивидики иҗадий коллективларниң қатнишиши билән концерт көрситилди.

Концерт җәриянида сөзгә чиққан М.Қәшқәрий намидики Җамбул вилайәтлик Уйғур этномәдәнийәт мәркизиниң рәиси Муһәббәт Турдиева жиғилғанларға яхши дәм елип қайтиш тилигини билдүрди. Әтиси дәм алғучилар футбол бойичә өткүзүлгән мусабиқидин кейин спортниң башқа түрлири бойичә өз ара күч синишип, бассейнда чөмүлүп, вақтини көңүллүк өткүзди. Шуңлашқиму улар икки күнлүк дәм елишниң наһайити мәзмунлуқ һәм көңүллүк өткәнлигини, өзлиригә йеңи достларни тапқанлиғини тәкитләп, мәзкүр чарә-тәдбирни уюштурғучиларға өз миннәтдарлиғини изһар қилишти.

Насирахун РОЗАХУНОВ.

Тараз шәһири.