• УЙҒУР АВАЗИ
• 18 Шілде, 2011

Мустәқилликкә беғишланди

Һазир җай-җайларда мустәқилликниң 20 жиллиғиға беғишланған чарә-тәдбирләр өткүзүлүп, уларға чоң-кичикниң һәммиси җәлип қилинмақта. Җүмлидин мәзкүр қутлуқ сәнәгә мунасивәтлик йеқинда Қизил Шәриқ йезисида Аси йеза округиниң тәшәббуси вә уюштуруши билән Челәк тәвәсигә қарашлиқ бир қатар йезилардин кәлгән ветеран футболчилар арисида турнир болуп өтти.

Қисқа митингидин кейин, командилар топларға бөлинип, қизғин оюнға киришти. Тәләпләргә мувапиқ, турнирда пәқәт биринчи вә иккинчи орунни егилигән командиларға кубок вә Пәхрий ярлиқлар тапшурулди. Турнирда Ғәйрәт вә Қизил Шәриқ йезилириниң командилири ғалип чиқти.

Турнирниң ахирида округ һакимийитиниң вәкиллири сөзгә чиқип, мәзкүр территория бойичә спорт саһасида қол йәткүзүватқан утуқларға тохтилип, турнир иштракчилириға тәшәккүр изһар қилди. Ветеран футболчилар намидин Турсун Қурбанов вә Асимҗан Илиясов уюштурғучиларға, мошундақ сәнәләрдә чоң әвлат спортчилирини чәттә қалдурмай, һөрмәт билдүрүватқанлиғи үчүн миннәтдарлиғини изһар қилди вә яшларниң спорт алимидә йәниму чоң утуқларға еришишигә тиләкдашлиқ билдүрди.

Абдулҗан АЗНИБАҚИЕВ.

Әмгәкчиқазақ наһийәси.