• УЙҒУР АВАЗИ
• 18 Шілде, 2011

17-миллионинчи турғун 2013-жили мартта туғулиду

Қазақстанда кейинки он жилда 65 вә униңдин чоң яштики адәмләрниң сани көпәйсә, балиларниң үлүш салмиғи төвәнлимәктә. Бу җумһурийәт аһалисиниң қериватқанлиғиниң рошән көрүнүши.

Neweurasіa.net интернет-порталиниң Қазақстан Җумһурийитиниң Статистика бойичә агентлиғиниң рәиси Әлихан Смаиловқа асаслинип хәвәр қилишичә, 2009-жили Қазақстанда жүргүзүлгән аһалини ройхәткә елиш 65 яштин чоң турғунлар саниниң мәмликәтниң умумий аһалисиниң 7,1 пайизиға йәткәнлигини көрсәткән.

— Хәлиқ ара үлгиләр бойичә мундақ мәмликәтниң аһалиси қериватқан болуп һесаплиниду, — дәп тәкитлигән Әлихан Смаилов. — Ейтмақчи, Россиядә 65 яштин чоң адәмләрниң үлүш салмиғи 12 пайизни тәшкил қилиду, Европиниң тәрәққий әткән мәмликәтлиридә болса, Қазақстандикигә қариғанда, икки һәссә ошуқ.

Әнди умумән қазақстанлиқлар һаятиниң рәқәмләрдә қандақ әкис етидиғанлиғиға тохталсақ, төвәндики мәлуматларға егә болумиз: мәмликәттә икки адәмдин (30,1 пайиз), үч адәмдин (26,7 пайиз) ибарәт аилиләр бесим. Аилиләрниң пәқәт 11,7 пайизила бәш, 5,6 пайизи алтә, 1,9 пайизи йәттә адәмдин ибарәт. 8 — 10 вә униңдин ошуқ әзалардин ибарәт аилиләрниң сани наһайити аз вә бари-йоқи 0,2 пайизнила тәшкил қилиду.

6 миллион 419 миң 508 аялниң 52,2 пайизи некада болуп, 28,2 пайизи һеч қачан некадин өтмигән болса, аялларниң 12,6 пайизини тул қалғанлар, 7,0 пайизини аҗришип кәткәнләр тәшкил қилиду.

Әрләргә мунасивәтлик әһвал төвәндикичә: 5 миллион 737 миң 197 әр кишиниң 57,1 пайизи өйләнгән, 36,9 пайизи бойдақ болса, 3,5 пайизини аҗришип кәткәнләр, 2,5 пайизини аяллири вапат болуп кәткәнләр тәшкил қилиду.

Йәнә бир факт — Статистика бойичә агентлиқниң тәхминлиригә қариғанда, 17-миллионинчи қазақстанлиқ 2013-жили мартта туғулиду.