• УЙҒУР АВАЗИ
• 25 Шілде, 2011

Иш — өмлүктә, күч — бирликтә

Мәлумки, өткән жили жигит башлириниң җумһурийәтлик қурултийи өтүп, биз, жигит башлириға, техиму зор җавапкәрлик жүкләнди. Илгири пәқәт той-төкүн, өлүм-житим ишлири биләнла шуғуллинип кәлгән болсақ, әнди җәмийитимиз һаятиниң барлиқ саһалирида йүз бериватқан йеңилиқ-өзгиришләргә мунасивәтлик паалийитимиз даириси хелила кәңәйди. Бу, әлвәттә, яхши. Лекин һәммила жигит башлирини саватлиқ, аң-сәвийәси жуқури, дәп ейтишқа техи әтигән.

Маңа Ишиктә региониниң баш жигит беши сүпитидә мошу тәвәгә қарашлиқ йезиларға берип, жигит башлири, инавәтлик адәмләр, мөтивәрләр билән учришип-сөһбәтлишишкә, уларниң баһалиқ пикир-мәслиһәтлирини тиңшашқа тоғра келиду. Ундақ чағларда, көплигән йезиларда атқурулуватқан изгү ишларниң гувачиси болуп, уларниң баш-қешида жүргән адәмләрдин миннәтдар болимән.

Бийил Қазақстан Җумһурийити мустәқиллигиниң 20 жиллиғи нишанлиниду. Һазир җай-җайларда мошу сәнәгә мунасивәтлик һәр хил мәдәний чарә-тәдбирләр, сәнъәт фестивальлири, тил мәйрәмлири уюштуруливатиду. Йеқинда Әмгәкчиқазақ наһийәлик Уйғур мәдәнийәт мәркизи тәрипидин Көктөбе йезисида өткүзүлгән «Достлуғи ярашқан йеза» намлиқ мәдәний чарә-тәдбир сөзимизниң рошән испатидур. Униңға йеза аһалиси, жирақ-йеқиндин кәлгән меһманлар болуп 500дин ошуқ адәм қатнашти.

Шуни қанаәтлиниш билән тәкитлигүм келидуки, биз мошундақ ишларни уюштуруштин бурун, наһийәлик Уйғур мәдәнийәт мәркизиниң рәиси Мәһәммәтҗан Җанбақиевниң тәшәббуси билән, йеза-йезилардики жут хизмитидә жүргән кишиләрниң салаһийитигә, сүпәт тәркивигә алаһидә етивар беришкә башлидуқ. Өзиниң жутида инавәтлик, әң муһими, жутдашлириға көйүнидиған адәмләрни жигит беши қилип сайлидуқ, униңға һәмкарлишидиған ярдәмчиләрниң санини көпәйтишкә тириштуқ.

Аялларниң җәмийитимиздә зор күч екәнлигини инавәткә елип, һәр бир йезида аяллар кеңишиниң рәиси вә униң икки орунбасарини, униңдин ташқири пәқәт яшлардин тәркип тапқан ханим-қизлар кеңишиниң рәиси вә униң икки орунбасарини көпчилик аваз билән сайлидуқ. Бу бизниң ишимизға өзиниң иҗабий тәсирини көрсәтти. Әнди җай-җайлардики жигит башлири, әйнә шу аяллар, яш ханим-қизлар кеңәшлири, ақсақаллар вә яшлар кеңәшлири әмәлгә ашурулуватқан мәдәний чарә-тәдбирлиримизниң техиму әһмийәтлик вә нәтиҗидарлиқ болушиға мунасип һәссисини қошмақта.

Мана мошундақ тәшкилий ишлар нәтиҗисидә Ғалибийәт күни һарписида Тәшкәнсаз вә Баяндай йезилиридики Ханим-қизлар кеңәшлириниң, җүмлидин, уларниң рәислири Нурбүви Ғазимова, Разийәм Илиеваниң тәшәббуси билән ветеранларға, шундақла уруш жиллириниң җапа-мәшәқитини тартқан бова-момиларға беғишлап чоң мәрасим уюштурулди. Йәнә мошу Тәшкәнсаз йезисида Азат йезисидики оттура мәктәпниң мудири, наһийәлик Уйғур мәдәнийәт мәркизиниң муавин рәиси Иврайимҗан Семәковниң тәшәббуси билән икки мәртә Ленин ордени билән мукапатланған, Улуқ Вәтән урушиниң ветерани Мәрүп Қасимовниң хатирисигә беғишлинип шахмат бойичә турнир өткүзүлди. Әнди Ават йезисида өткән волейбол бойичә мусабиқә мошу жутта йерим әсиргә йеқин вақит давамида жигит беши болуп ишләп аброй қазанған маһир тәшкилатчи Мәмәтияр Мәңсүровниң хатирисигә беғишланди. Ейтивәрсәк мундақ мисаллар көпләп санилиду.

Тәшкәнсаз йеза округиниң һакими Абдирим Насировниң қоллап-қувәтлиши, жут активистлириниң ярдими билән мошу йезидики Маһинур Аюпованиң от кетиш ақивитидин көйүп күл болған өйиниң орниға йеңи өй селиниватиду. Униң үчүн жуттин 800 миң тәңгә ахча вә қурулуш материаллири жиғилди. Бу болсиму хәлқимизниң өмлүгиниң, инақлиғиниң рошән испатидур.

Һәр бир жутта өз мәнпийитидин көпчилик мәнпийитини жуқури санайдиған милләтпәрвәр, сахавәтлик адәмәр бар. Шуларниң қатарида көктөбилик Иврайимҗан Қәмбәров, аватлиқ Нурмәһәмәт Мәңсүров, Раһат мәлисидики мәрт-мәрданә жигитләрдин Турсунҗан Сәпәров, Туғлуқ Давутов, Абдуллам һаҗим Мәхсүтов, Илияс Әһәтовниң исимлирини мәмнунийәт билән тилға елишқа әрзийду. Пурсити кәлгәндә шуниму қошумчә қилиш керәкки, өзәм раһатлиқ болғачқа, бизгә йол көрситип, әқил-мәслиһәтлирини айимайдиған жутдашлирим Әнвәр һаҗим Сәпәров, Абдул Надиров, Мәхсум Қурбанов, Хизир Һаҗиев, Мусрәт Вәлиев вә Қари Һакимахуновтин бәк миннәтдармиз. «Ялғуз атниң чеңи чиқмас», дәйду хәлқимиз. Бу җәһәттин жутдарчилиқ ишларда яр-йөләк болуп келиватқан җай-җайлардики ярдәмчилирим Салават Абдуллаев, Абдукерим Юсупов, Турғанҗан Идрисов, Тохтахун Әһәтов, Ришат Һакимахунов, Һәмрақиз Мәхсүтова, Пәридәм Әйсарова, Зулпийәм Җәлилова, Зорәм Юсупова, Меһриван Һаҗиева, Қарихан Әйсарова, Адаләт Давутова, Света Реҗәпова, Рабийәм Мусаева, Зулпийәм Мәсимоваға ейтар миннәтдарлиғимиз чәксиз.

Мана мошу җан көйәрлиримизниң актив күч чиқириши билән миллий мәтбуатимизниң карван беши һесаплинидиған «Уйғур авази» гезитиниң муштирилири санини Ишиктә региони бойичә кәскин көпәйтишни нийәт қиливатимиз. Буни қуруқ сөз әмәс, ениқ вәдә дәп қобул қилишимиз лазим.

Йәкүнләп ейтқанда, жигит башлириниң вәзиписи, қурултай қарарлириға асасән, заман тәливигә лайиқ болуши керәк. Башта тәкитләнгинидәк, жигит башлириниң паалийити пәқәт той-төкүн, нәзир-чирақлар биләнла чәклинип қалмай, йәрлик мәдәнийәт мәркәзлири вә башқиму җәмийәтлик асастики тәшкилатлар билән һәмкарлиқта хәлиқләр достлуғини мустәһкәмләшкә, милләтләр ара разимәнликни сақлашқа, Қазақстанниң гүлләп-яшнап, ихтисадиниң техиму тәрәққий етишигә көпчиликни сәпәрвәр қилишимиз керәк, миллий әнъәнилиримизни, илғар урпи-адәтлиримизни кәң тәрғип қилип, яшлиримизға үгитишимиз лазим. Шундақ қилған тәғдирдила биз өзимизгә жүкләнгән вәзипә һөддисидин шәрәп билән чиқимиз.

Турсунмәһәмәт АБДУСЕМӘТОВ,

Ишиктә региониниң баш жигит беши.

Әмгәкчиқазақ наһийәси.